संजय जाधव, साम टीव्ही

Buldhana Chikhali Taluka News : सकाळची शाळा करून घरी परतल्यानंतर १० वर्षीय चिमुकल्यांनी जेवण केले. नंतर पोहण्याचा मोह झाल्याने दोघेही गाव शिवारातील तलावावर गेले. मात्र, खोल पाण्यात उतरल्यानंतर पाण्याचा अंदाज न आल्याने दोघेही पाण्यात बुडाले. गाळात फसून त्यांचा मृत्यू झाला. (Latest Marathi News)

ही दुर्देवी घटना बुलडाणा (Buldhana) जिल्ह्यातील चिखली तालुक्यात २८ फेब्रुवारीला घडली. अनिकेत जाधव आणि आदित्य जाधव अशी मृत मुलांची नावे आहेत. सायंकाळी जनावरे पाणी पाजण्यासाठी शेतकरी तलवावर गेल्यावर हा सगळा प्रकार उघडकीस आला. ग्रामस्थानी तत्काळ तलावात शोध घेऊन दोन्ही मुलांचे मृतदेह बाहेर काढले. या घटनेनं चिखली तालुक्यातील करवंड गाव हळहळलं आहे.

मिळालेल्या माहितीनुसार, मृत अनिकेत चौथीत तर आदित्य हा पाचव्या वर्गात शिकत होता. दोघे मित्र २८ फेब्रुवारीला दुपारच्या सुमारास गावाशेजारी असलेल्या धरणात पोहायला गेले होते. अनिकेतला पोहायला येत होते मात्र आदित्यला पोहता येत नसल्यामुळे पाण्याचा अंदाज न आल्याने दोघांचा धरणात गाळात फसल्यामुळे बुडून दुर्दैवी अंत झाला.

संध्याकाळी गावातील शेतकरी म्हशींना पाणी पाजण्यासाठी धरणावर गेला होते. त्यांना तलावाच्या काठावर मुलांचे चपला व कपडे आढळून आले. त्यामुळे शेतकऱ्याने गावात जाऊन गावकऱ्यांना ही माहिती दिली. पाठोपाठ धरणावर गर्दी करून शोध घेण्याचा प्रयत्न केला.

गावातीलच शालीग्राम गवई यांनी पाण्यात उतरून शोध घेतला. त्यांच्या पायाला मुलांचे डोके लागले. त्यामुळे दोन्ही मुले गाळात फसल्याचे त्यांच्या लक्षात आले. गावकऱ्यांच्या मदतीने अनिकेत आणि आदित्यचे मृतदेह बाहेर काढण्यात आले.

Edited By - Satish Daud