संजय जाधव, बुलडाणा

बुलडाण्यामध्ये बाळाच्या पोटात बाळ असल्याची दुर्मिळ घटना समोर आली होती. या दुर्मिळ घटनेतील महिलेची सुरक्षित प्रसुती झाली. बुलडाणा जिल्हा महिला रुग्णालयात शस्त्रक्रिया करून महिलेची प्रसुती करण्यात आली. महिला आणि तिचे बाळ यांची प्रकृती स्थिर आहे. बुलडाणा जिल्ह्यात वैद्यकीय क्षेत्राच्या इतिहासात अशी ही दुर्मिळ घटना घडली आहे. सध्या या घटनेची सर्वत्र चर्चा होत आहे.

मिळालेल्या माहितीनुसार, बुलडाण्यातील एका महिलेच्या पोटामध्ये असणाऱ्या बाळाच्या पोटात बाळ असल्याची घटना समोर आली होती. बाळाच्या पोटात बाळ दुर्मिळ अशा घटनेतील महिलेची सुरक्षित प्रसुती झाली आहे. बुलडाणा जिल्हा महिला रुग्णालयात शस्त्रक्रिया करून महिलेची प्रसुती करण्यात आली असून दोघांची प्रकृती चांगली आहे. आता बाळाच्या पोटातही बाळ असल्याने पुढील उपचारासाठी बाळासह महिलेला अमरावती येथील रुग्णलयात पाठवण्यात आले आहे. वैद्यकीय क्षेत्रातील अतिशय दुर्मिळ अशा घटनेतील महिलेची प्रसूती सुरक्षित झाल्याने डॉक्टरांच्या पथकाने समाधान व्यक्त केले.

या दुर्मिळ परिस्थितीला वैद्यकीय भाषेत फिटस इन फेटू असं म्हटलं जातं. साधारणतः पाच लाख सामान्य गर्भवती महिलांत अशा प्रकारची एखादी घटना बघायला मिळते. बुलडाणा जिल्हा महिला रुग्णालयामध्ये ही ३२ वर्षीय गर्भवती महिला आपल्या नियमित तपासणीसाठी रुग्णालयात आली. डॉक्टरांनी तपासून महिलेला सोनोग्राफी करण्याचा सल्ला दिला होता. सोनोग्राफी केल्यानंतर या महिलेच्या पोटातील बाळाच्या पोटात दुसरं बाळ असल्याचे समोर आले होते.

दरम्यान, महिलेच्या पोटातील बाळाच्या पोटातही बाळ असणं या परिस्थितीला फिटस इन फिटो असं वैद्यकीय भाषेत म्हटले जाते. हे अतिशय दुर्मिळ अशी परिस्थिती असून आतापर्यंत जगात फक्त २०० तर आपल्या देशात ९ ते १० अशा घटना समोर आल्याच्या नोंदी आहेत. त्यामुळे वैद्यकीय क्षेत्रातील इतिहासात बुलडाण्यात पहिल्यांदा अशा प्रकारची घटना समोर आली आहे. या घटनेची सर्वत्र चर्चा होत आहे.