बुलढाणा : बांधकाम कामगारांना वेगवेगळ्या योजना राबवून मदत दिली जात आहे. दरम्यान बांधकाम कामगार कार्यालयाकडून इमारत बांधकाम कामगारासह त्याच्या पाल्यांना शिक्षण, आरोग्य यासह इतर बाबींसाठी आर्थिक लाभ दिला जातो. मात्र विधवा महिलेचे आधार कार्ड बँक खात्याशी लिंक करून एक लाख रुपयांचा लाभ घेतल्याचा धक्कादायक प्रकार बुलढाणा जिल्ह्यात समोर आला आहे. 

शासनाच्या विविध योजना सुरु असून बांधकाम कामगारांसाठी देखील वेगवेगळ्या योजना राबविण्यात येत आहेत. मात्र बांधकाम कामगार असल्याचे दाखवत शासनाच्या योजनेचा लाभ घेतल्याचे समोर आले आहे. (Buldhana) बुलढाणा तालुक्यातील आकाश हिवाळे या व्यक्तीने हा प्रकार केला आहे. आकाश हिवाळे याने मंगला गायके या विधवा महिलेचे आधार कार्ड आपल्या स्वतःच्या बँक (Bank) खात्याला लिंक करून एक लाख रुपयाचा लाभ घेतल्याचा धक्कादायक प्रकार उघडकीस आला आहे. 

कारवाईची मागणी 

सदर महिला लाभ घेण्यासाठी आपले खाते नूतनीकरण करण्यासाठी बँकेत गेली असताना हा प्रकार समोर आला आहे. तर या संपूर्ण प्रकाराच्या बाबतीत बांधकाम कामगार कार्यालय मात्र अनभिज्ञ असून कार्यालयाचा अनागोंदी आणि गलथान कारभार यातून समोर आला आहे. दरम्यान फसवणूक करणाऱ्या या व्यक्तीवर कायदेशीर कारवाई करण्याची मागणी केली आहे.