संजय जाधव, साम टीव्ही

Buldhana Crime News

राज्यात दिवाळीचा सण उत्साहात साजरा केला जात असताना बुलढाणा जिल्ह्यात एक संतापजनक घटना घडली. मेहकर शहरात लक्ष्मीपूजनाच्या दिवशी गुंड प्रवृत्तीच्या टोळक्याने धार्मिक कारणावरून राडा केला. मंदिरात दर्शनासाठी जाणाऱ्या अल्पवयीन मुलीसमोर फटाका फोडला, तिची छेड काढली. ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

इतकंच नाही, तर अल्पवयीन मुलीच्या मदतीसाठी आलेल्या लोकांना देखील या टोळक्याने लाठ्या-काठ्यांनी मारहाण केली. या घटनेनंतर पोलिसांनी तातडीने तपासाची चक्रे फिरवत टोळक्याला अटक केली. दरम्यान या प्रकाराची माहिती मिळाल्यानंतर, आमदार संजय गायकवाड शेकडो कार्यकर्ते घेऊन मेहकरात पोहचले.

आमदार संजय गायकवाड (Sanjay Gaikwad) मेहकर पोलिसांवर चांगलेच संतापले. तुम्ही गुंडांवर गुन्हे दाखल केले असले, तरी माझा हिशोब बाकी आहे. त्यांची जमानत झाल्यावर मी त्यांना तोडल्याशिवाय राहणार नाही, असा इशारा आमदार संजय गायकवाड यांनी दिला.

घटना नेमकी काय?

तक्रार महिला आमदार संजय गायकवाड यांच्या भाची आहेत. त्या मेहकर शहरातील (Buldhana News) रहिवासी असून लक्ष्मीपूजनाच्या दिवशी रात्री साडेसात वाजता त्या परिसरातील महिलांसह देवदर्शनासाठी मंदिरात जात होत्या. यावेळी अचानक २० ते २५ जणांच्या टोळके हातात लाठ्या काठ्या घेऊन महिलांना आडवे आले. त्यातील एका आरोपीने १५ वर्षीय मुलीसमोर फटाका फोडला, अश्लील हावभाव करून मुलीची छेड काढली.

इतकंच नाही, तर आरोपींनी तक्रारदार महिलेच्या अंगावरील १ तोळा सोन्याचे मंगळसूत्र बळजबरीने हिसकावून घेतले. त्यांनी महिलेने मदतीसाठी आरडाओरड केली तेव्हा त्यांचा मुलगा आणि त्याचा मित्र धावत आला. पण टोळक्याने त्या दोघांनाही बेदम मारहाण केली. याप्रकरणी पोलिसांनी २५ ते ३० जणांविरुद्ध गुन्हा दाखल केला आहे.

घटनेची माहिती मिळताच आमदार संजय गायकवाड शेकडो कार्यकर्त्यांसह मेहकरात पोहचले. यावेळी घटनास्थळी जाऊन त्यांनी पाहणी केली. आम्ही देखील छत्रपती शिवाजी महाराजांचे मावळे आहोत. जर दिवाळी नसती तर एकेकाचे तुकडे केले असते. आता पोलिसांनी गुन्हा दाखल केला असला तरी माझा हिशोब बाकी आहे, असे आमदार संजय गायकवाड म्हणाले.

Edited by - Satish Daud