संजय जाधव, साम प्रतिनिधी

बुलढाण्यातील नांदुरा - बुऱ्हाणपूर मार्गावर वडाप टॅक्सीचा भीषण अपघात झालाय. रस्त्याजवळ असलेल्या खड्ड्यात भरधाव टॅक्सी उलटली आहे. या भीषण अपघातात टॅक्सीतील १० जण गंभीर जखमी झालेत. सर्व जखमींना खामगाव येथील शासकीय रुग्णालयात दाखल करण्यात आले आहे. अपघातानंतर नांदुरा बुऱ्हानपूर मार्गावरील वाहतूक ठप्प झाली असून पोलीस घटनास्थळी पोहोचले आहेत.

दरम्यान आज सकाळी बुलढाण्यातील छत्रपती संभाजीनगर मार्गावर एसटी बस आणि दुचाकीचा अपघात झाला होता. आता संध्याकाळी बुलढाण्यात दुसरी दुर्घटना घडलीय.

ST बस अन् दुचाकीची समोरासमोर धडक, ३ तरुणांचा जागीच मृत्यू

बुलढाण्यातील छत्रपती संभाजीनगर महामार्गावर धाड गावाजवळ एसटी बस आणि दुचाकीची समोरासमोर धडक झाली. भरधाव दुचाकी छत्रपती संभाजीनगरहून बुलढाण्याकडे जाणाऱ्या शिवशाही बसला धडकली. या भीषण अपघातात दुचाकीवरील तीन तरुणांचा जागीच मृत्यू झाला. अपघातात मृत पावलेले तरुण हे बुलढाणा तालुक्यातील ढाल सावंगी गावातील रहिवाशी होते.

कैलास दांडगे, रवी चंदनशिव आणि अंकुश पाडळे असे मृत पावलेल्यांची नावे आहेत. तिन्ही तरुण हे विशीतील वयोगटातील होते. या अपघातानंतर महामार्गावरील वाहतूक ठप्प झाली. या अपघातानंतर अपघातस्थळी मोठा जमाव झाला. महामार्गावर झालेल्या अपघाताची माहिती मिळताच पोलिसांनी घटनास्थळी धाव घेतली. त्यानंतर अपघातस्थळी जमा झालेली गर्दी पोलिसांनी पांगवली.