बुलढाणा : शेतकऱ्याच्या शेतातून केळीची कापणी केल्यानंतर व्यापाऱ्याने खरेदी केलेली केळी ट्रकमध्ये भरून मार्केटमध्ये नेण्यात येत होती. मात्र टुनकी ते सोनाळा या मार्गावर केळीने भरलेला हा ट्रक पलटी होऊन भीषण अपघात झाला. या अपघातात ट्रकवर बसलेल्या दोन मजुरांचा जागीच मृत्यू झाला असून इतर पाच जण गंभीर जखमी झाल्याची घटना घडली आहे. जखमींना उपचारासाठी रुग्णालयात दाखल करण्यात आले आहे. 

बुलढाणा जिल्ह्यातील संग्रामपूर तालुक्यातील टुनकी ते सोनाळा या मार्गावर सदरचा अपघात घडला असून रात्री ९ वाजताच्या सुमारास हि घटना घडली. जळगाव जामोद रस्त्याकडून केळीने भरून टूनकी कडे येत असलेले आयशर वाहनावरील चालकाचा ताबा सुटल्याने वाहन रस्त्याच्या कडेला जाऊन पलटी झाले. या अपघातात निलेश तेजराव चव्हाण (वय ४०) व बाळू रायबोले (वय ४२) या दोघांचा जागीच दुर्दैवी मृत्यू झाला.  

पाच मजुर जखमी 

दोघांचा मृत्यू झाला असून पाच मजूर जखमी झाले आहेत. यात गुणवंत रामदास चव्हाण (वय ३५), हरीश रामदास चव्हाण (वय २२), वनदेवराव जगनराव वानखडे (वय ४२), शाहीद खा मुनदर खा पठाण (वय ३८), ईद्रीस खा इब्राहिम खान (वय ४०) हे पाच जण गंभीर जखमी असल्याची माहिती प्राप्त झाली आहे. सर्व जखमी अंजनगाव येथील रहिवासी असल्याचे समजते. जखमींना लागलीच रुग्णालयात दाखल करण्यात आले. 

अपघातानंतर वाहतूक खोळंबली 

या घटनेची माहिती मिळताच सोनाळा पोलीस ठाण्याचे ठाणेदार चंद्रकांत पाटील आपल्या ताफ्यासह घटनास्थळी तात्काळ धाव घेतली. अपघातानंतर बराच वेळ घटनास्थळी नागरिकांची मोठी गर्दी झाली होती. तर पोलीसांनी लोकांना बाजूला सावरत तातडीने वाहतुक पूर्ववत सुरळीत केली. याबाबत काल रात्री उशिरापर्यंत या प्रकरणी कोणताही गुन्हा दाखल झाला नव्हता या घटनेचा पुढील तपास सोनाळा पोलीस करीत आहेत.