संदिप भोसले| लातूर, ता.८ जुलै २०२४

राज्यात गेल्या काही दिवसांपासून भीषण अपघातांचे सत्र सुरू आहे. वरळीमधील हिट अँड रन प्रकरण ताजे असतानाच लातूरमध्ये भरधाव कारने दुचाकीला उडवल्याची घटना घडली. यामध्ये दुचाकीवरील पतीचा जागीच मृत्यू झाला असून पत्नी गंभीर जखमी झाला आहे.

याबाबत समोर आलेल्या माहितीनुसार, लातूर- उदगीर महामार्गावर कार आणि दुचाकीचा भीषण अपघात झाला आहे. या अपघातात दुचाकीवरील एक जण जागीच ठार झाला तर एक जण गंभीर जखमी आहे. अपघातात मरण पावलेले रवी गुळंगे हे उदगीर येथील एका शाळेत शिक्षक पदावर होते.

पत्नीसह ते दुचाकीवरुन जात असताना उदगीरच्या मलकापूर नजिक स्विफ्ट डिझायर गाडी आणि दुचाकीचा भीषण अपघात झाला. या अपघातात रवी गुळंगे वय (40) वर्ष यांचा जागीच मृत्यू झाला. या दुर्दैवी घटनेने परिसरात शोककळा पसरली आहे.

हिंगोलीच्या औंढा तालुक्यातील धारखेडा पाटी जवळ कर्तव्य बजावून परत येणाऱ्या हिंगोली पोलीस दलातील सहाय्यक पोलीस उपनिरीक्षकास भरधाव दुचाकी चालकाने धडक दिल्याने भीषण अपघात घडला आहे, या घटनेत पोलीस अधिकारी अफसर पठाण हे गंभीर जखमी झाले असून त्यांच्यावर रुग्णालयात उपचार सुरू आहेत. रात्रीच्या सुमारास ही घटना घडल्याची माहिती औंढा पोलिसांनी दिली असून याप्रकरणी दुचाकी चालकाविरोधात गुन्हा दाखल करण्याची प्रक्रिया सुरू करण्यात आली आहे