बीड तालुक्यातील दादाहरी वडगाव येथील रहिवासी आणि शिवसेनेचे माजी तालुकाप्रमुख शिवाजीराव शिंदे यांनी आपल्या राहत्या घरी गळफास घेऊन आत्महत्या केल्याची धक्कादायक घटना समोर आली आहे. या घटनेमुळे बीड जिल्ह्यासह महाराष्ट्राच्या राजकीय वर्तुळात खळबळ उडाली आहे.

मिळालेल्या माहितीनुसार, अवघ्या ४ महिन्यांपूर्वी शिंदेंवर कोयत्याने हल्ला करण्यात आला होता. या हल्ल्यातून ते बचावले गेले. मात्र त्यांनी दादाहरी वडगाव येथील त्यांच्या राहत्या घरात गळफास घेत आत्महत्या केल्याने खळबळ उडाली आहे. शिवाजीराव शिंदे हे शिवसेनेमध्ये तालुकाप्रमुख म्हणून कार्यरत होते. पक्षाच्या संघटनात्मक कामात त्यांचा सहभाग होता.

दरम्यान, शिवाजीराव शिंदे यांनी नेमक्या कोणत्या कारणामुळे हे टोकाचे पाऊल उचलले, याबाबत अद्याप कोणतीही अधिकृत माहिती समोर आलेली नाही. आत्महत्येचे कारण स्पष्ट झाले नसल्याने विविध चर्चांना उधाण आले आहे. ही आत्महत्या आहे की हत्या? असा प्रश्न उपस्थित केला जात आहे. घटनेची माहिती मिळताच पोलिसांनी तातडीने घटनास्थळी धाव घेतली. पोलिसांनी घटनास्थळाचा पंचनामा करून पुढील कायदेशीर प्रक्रिया सुरू केली. त्यानंतर शिवाजीराव शिंदे यांचा मृतदेह शवविच्छेदनासाठी उपजिल्हा रुग्णालयात आणण्यात आला.

शिवाजीराव शिंदे यांच्या पार्थिवावर दुपारी ११ वाजता अंत्यसंस्कार करण्यात येणार असल्याची माहिती मिळत आहे. त्यांच्या निधनाची बातमी समजल्यानंतर दादाहरी वडगाव परिसरातील नागरिक तसेच राजकीय क्षेत्रातील अनेक व्यक्तींनी शोक व्यक्त केला. या प्रकरणाचा पुढील तपास पोलीस करत असून, आत्महत्येमागील नेमके कारण तपासातून स्पष्ट होणार आहे. पोलिसांच्या तपासानंतरच या घटनेशी संबंधित अधिकृत माहिती समोर येण्याची शक्यता आहे. शिवाजीराव शिंदे यांच्या निधनामुळे बीड जिल्ह्यातील राजकीय आणि सामाजिक क्षेत्रात हळहळ व्यक्त होत असून, त्यांच्या निधनाने कुटुंबीय, नातेवाईक आणि समर्थकांवर दुःखाचा डोंगर कोसळला आहे.