वाशिम : वाशिम शहरातील रमेश टॉकीज परिसरात अवैध गर्भपात करण्यापूर्वी एका दवाखान्यावर आरोग्य विभागाच्या पथकाने व शहर पोलिसांनी संयुक्त कारवाई करीत डॉ. एस.एम.सारसकर या डॉक्टरसह विलास ठाकरे या बोगस डॉक्टर ला अटक केली आहे. वाशिम शहरातील रमेश टॉकीज परिसरातील एस.एम.सारसकर नामक दवाखान्यात अवैध गर्भपात होत असल्याची माहिती जिल्हा प्रशासनाच्या टोल फ्री नबंरवर मिळाली होती.

हे देखील पहा -

या माहितीच्या आधारे आरोग्य विभाग व पोलिसांनी सापळा रचून छापा मारून, या दवाखान्याची झडती घेतली असता त्यामध्ये गर्भपात करण्याच्या औषधीचा साठा आणि अन्य साहित्य मिळून आले. सदर साहित्य जप्त करून आरोपी डॉ.सारसकरसह विलास ठाकरे बोगस डॉक्टरलाही अटक करून वाशिम शहर पोलिसांच्या ताब्यात देण्यात आले आहे.

या दोन्ही डॉक्टरांविरोधात विविध कलमान्वये वाशिम शहर पोलीस स्टेशन येथे गुन्हा दाखल करण्यात आला आहे. दरम्यान गर्भपात करण्यासाठी आलेल्या महिलेला गर्भपाताच्या गोळ्या दिल्यानं तिला त्रास वाढल्याने जिल्हा सामान्य रुग्णालय येथे दाखल करण्यात आले असून तिचा शास्त्रीय पद्धतीने गर्भपात करण्यात आला आहे. सध्या त्या महिलेची प्रकृति चांगली असल्याची माहिती जिल्हा शल्य चिक्तिसक डॉ. मधुकर राठोड यांनी दिली आहे.

Edited By : Krushnarav Sathe