भरत मोहळकर-

महाराष्ट्रात महायुतीला घवघवीत यश मिळालंय.. मात्र या घटनेला 5 दिवस उलटून गेल्यानंतरही महायुतीचा मुख्यमंत्रिपदाचा चेहरा ठरत नसल्याचं चित्र आहे. त्यामुळे भाजप महाराष्ट्रात धक्कातंत्र वापरण्याची शक्यता वर्तवली जातेय. कारण गेल्या काही वर्षातला इतर राज्यांचा इतिहास पाहिला तर ही मालिका कशी सुरू झाली ते पाहूयात...

पहिला धक्का

2017 मधील उत्तर प्रदेशच्या निवडणुकीत भाजपला पहिलांदा स्पष्ट बहुमत मिळालं. त्यानंतर केशव प्रसाद मौर्य आणि मनोज सिन्हांसारखे दिग्गज स्पर्धेत होते. त्यावेळी भाजपने मुख्यमंत्रिपदाचा चेहरा ठरवण्यासाठी 9 दिवसांचा वेळ घेतला. आणि भाजपने कट्टर हिंदुत्ववादी खासदार योगी आदित्यनाथांना मुख्यमंत्रिपदी बसवून धक्कातंत्राचा वापर केला.

दुसरा धक्का

2023 मध्ये मध्यप्रदेशात शिवराज सिंह चौहान यांची लोकप्रियता प्रचंड होती. त्यावेळी शिवराजसिंह चौहान सरकारने आणलेल्या लाडली बहीण योजनेमुळे भाजपला मोठं यश मिळालं. मात्र 8 दिवसांचा वेळ घेत भाजपने पुन्हा धक्कातंत्र वापरून चर्चेत नसलेल्या मोहन यादव यांच्या गळ्यात मुख्यमंत्रिपदाची माळ घातली..

तिसरा धक्का

2023 मध्येच राजस्थानमध्ये झालेल्या निवडणुकीत वसुंधराराजे आणि गजेंद्र सिंह शेखावत यांची नावं चर्चेत होती. मात्र भाजपने 9 दिवसांच्या चर्चेनंतर धक्कातंत्र वापरून पहिल्यांदाच आमदार झालेल्या भजनलाल शर्मांना मुख्यमंत्री बनवलं.

चौथा धक्का

2023 मध्ये झालेल्या ओडिशातील विजयानंतर धर्मेंद्र प्रधान, मनमोहन सांबल यांची नावं चर्चेत होती. मात्र भाजपनं धक्कातंत्र वापरून ओडिशात मोहन मांझी यांच्यासारख्या चर्चेत नसलेल्या नावावर शिक्कामार्तब केलं.. यावेळीही भाजपला मुख्यमंत्री ठरवायला तब्बल ८ दिवस लागली.

खरं पाहिलं तर भाजपनं धक्कातंत्राची सुरूवात महाराष्ट्रातूनच केली होती. २०१४ मध्ये तत्कालीन केंद्रीय मंत्री नितीन गडकरी, विरोधी पक्षनेते एकनाथ खडसे, विनोद तावडे, सुधीर मुनगंटीवारांसारख्या अनुभवी नेत्यांना बाजूला सारून कोणताही मंत्रिपदाचा अनुभव नसलेल्या देवेंद्र फडणवीसांना मुख्यमंत्री करून धक्का दिला होता. आता १० वर्षांनंतर महाराष्ट्रात भाजप पुन्हा धक्कातंत्राचा वापर करणार की देवेंद्र फडणवीसच मुख्यमंत्री होणार याची उत्सुकता लागलीय.