फोडाफोडीच्या राजकारणानंतर भाजप आणि शिंदेसेनेत मुंबईच्या महापौरपदावरुन जुंपलीय... दुसऱ्याची पोरं नाही तर स्वतःचं पोर कडेवर घेणार असल्याचं वक्तव्य करुन कौशल्य विकास मंत्री मंगलप्रभात लोढांनी मुंबईत भाजपचाच महापौर बनवणार असल्याचं वक्तव्य केलंय...त्यावरुन शिंदेसेनेनंही महायुती झाली नाही तरी आमचाच महापौर होणार, असा निर्धार केलाय..

महापौरपदावरुन भाजप आणि शिंदेसेना आमने-सामने आल्यानं विरोधकांच्या हाती आयतं कोलित मिळालंय... त्यामुळे विरोधकांनी महापौरपदाच्या वादात उडी घेतलीय.. तर दिल्लीच्या आकाने भाजपचा महापौर करण्याचे आदेश दिल्याचा खोचक टोला काँग्रेसनं लगावलाय..मात्र ठाकरेसेनेनं मात्र भाजपचा दावाच खोडून काढलाय..

खरंतर नगरपरिषद आणि नगरपंचायत निवडणुकीत अनेक ठिकाणी भाजप आणि शिंदेसेनेत संघर्ष पेटला... तर फोडाफोडीच्या राजकारणामुळे आगीत तेल ओतलं गेलं... आता या वादावर पडदा टाकण्याचा प्रयत्न होत असतानाच महापौरपदावरुन नव्या वादाला तोंड फुटलंय... . त्यामुळे मुंबईच्या महापौरपदावरुन पेटलेला वाद मिटणार की या वादामुळे महायुती तुटणार? याची उत्सुकता आहे. मात्र निवडणुकीआधीच महापौरपदासाठी गुडघ्याला बाशिंग बांधल्याने त्याचा फटका महायुतीलाच बसण्याची शक्यता अधिक आहे. कारण मुंबई जिंकण्यासाठी ठाकरे बंधूंनीही वज्रमुठ आवळली आहे. त्यामुळे दोघांच्या भांडणात कोणाचा लाभ होणार ? याकडे सगळ्याचं लक्ष लागलं आहे.