मुंबई : राज्यसभा निवडणूक (Rajyasabha election) येत्या १० जूनला होत असून सर्वच पक्षांचे उमेदवार निवडणूक जिंकण्यासाठी रणनीती आखत आहेत. शिवसेनेचे खासदार संजय राऊत (sanjay Raut) यांनी राज्यसभा निवडणुकीत विरोधी पक्ष घोडेबाजार करणार असल्याची शक्यता वर्तवली आहे. राऊतांच्या या वक्तव्यानंतर राजकीय वातावरण तापलं असून भारतीय जनता पक्षाच्या (bjp) नेत्यांकडूनही आता प्रतिक्रिया येऊ लागल्या आहेत.

विधान परिषदेचे विरोधी पक्षनेते प्रविण दरेकर (Pravin Darekar) यांनी राऊंतांवर घोडेबाजाराच्या मुद्द्यावरुन निशाणा साधला आहे. आमदारांच्या घोडेबाजार करण्याच्या वक्तव्याचा मी निषेध करतो. आमदारांना अवमानीत करु नये.आतातरी यांना सुबुद्धी व्हावी, असं म्हणत दरेकर यांनी नाव न घेता संजय राऊत यांना टोला लगावला आहे.

राज्य सरकारला 'वसुली सरकार' नाव ठेवलं

राज्यसभेच्या निवडणुकीच्या पार्श्वभूमीवर दरेकर माध्यमांशी बोलताना म्हणाले, राज्यसभा निवडणुकीत घोडेबाजार होत असेल, तर सरकार तुमचं आहे, हा तपास करा.घोडेबाजार कुठे होतो याचा शोध घ्या. पराभूत झाल्यानंतर घोडेबाजारामुळे पराभव झाला अशी वातावरण निर्मीती करण्याचं काम चालू आहे. सरकारमध्ये काम करणारे अधिकारी वसुली करत आहेत. त्यामुळे आम्ही या सरकारला वसुली सरकार नाव ठेवलं आहे, असा गंभीर आरोपही दरेकरांनी राज्य सरकारवर केला आहे.

दरम्यान, गृह राज्यमंत्री सतेज पाटील यांच्यावरही दरेकरांनी टीका केली. ते म्हणाले, सतेज पाटलांवर बोलून आता का तोंडाची वाफ दवडायची.कोण कोणासोबत आहे, याबाबत शुक्रवारी सतेज पाटलांना कळेल. शुक्रवारची वाट पाहा. धनंजय महाडिक निवडून येतील, असा ठाम विश्वासही दरेकरांनी व्यक्त केला.

Edited By - Naresh Shende