अमर घटारे,साम टीव्ही

भाजप नेत्या नवनीत राणा यांना रुग्णालयात दाखल करण्यात आलं आहे. भाजपच्या माजी खासदार नवनीत राणा यांच्या पायाला गाठ झाली आहे. त्यामुळे त्यांना उपचारासाठी नागपूर येथील खासगी रुग्णालयात दाखल करण्यात आलं आहे. त्यांच्यावर रुग्णालयात तातडीने उपचार सुरु करण्यात आले आहेत.

रुग्णालयात दाखल केलेल्या राणा यांना डॉक्टरांच्या सल्ल्यानुसार तब्बल २५ दिवस बेड रेस्ट करावी लागणार आहे. लोकसभा निवडणुकीदरम्यान त्यांच्या पायला इजा झाली होती. आता परत पायाला एक गाठ झाली असल्याने नवनीत राणा यांना उपचारासाठी रुग्णालयात दाखल करण्यात आलं आहे. या दरम्यान नवनीत राणा यांना धमकी आली असल्याने रुग्णालयात सुरक्षा रक्षक देखील तैनात करण्यात आले आहेत.

भाजप नेत्या नवनीत राणा यांना जीवे मारण्याची धमकी

अमरावतीच्या माजी खासदार नवनीत राणा यांना पुन्हा एकदा जिवे मारण्याची धमकी मिळाली. हैदराबादहून अब्दुल नावाच्या व्यक्तीने स्पीडपोस्टद्वारे पत्र पाठवत धमकी दिली. धमकी देणाऱ्याने पत्रात अश्लील भाषेत मजकूर लिहिलाय.

चार दिवसांपूर्वीच हैदराबादच्या जावेद नावाच्या व्यक्तीकडून नवनीत राणा यांना अत्याचार आणि हत्या करण्याची धमकी पत्राद्वारे देण्यात आली होती. या प्रकारानंतर राजापेठ पोलिसांनी नवनीत राणा यांच्या स्वीय सहाय्यकाच्या तक्रारीवरून गुन्हा दाखल केला. तर दुसरीकडे नवनीत राणा यांना रुग्णालयात दाखल करण्यात आलं आहे. धमकीच्या पार्श्वभूमीवर रुग्णालयात सुरक्षा रक्षक तैनात करण्यात आले आहेत.