BJP MLC elections Maharashtra Legislative Council : आगामी विधान परिषद निवडणुकीच्या पार्श्वभूमीवर राज्यातील वातावरण आता चांगलेच तापू लागले आहे. विधान परिषदेच्या निवडणुकीतील रिक्त ९ जागांपैकी ४ जागा भाजपच्या वाट्याला येणार आहेत. या ४ जागांसाठी भाजप नेत्यांकडून आतापासूनच जोरदार मोर्चेबांधणी सुरू झाली आहे. ज्या नेत्यांना नुकत्याच झालेल्या राज्यसभा निवडणुकीत संधी मिळू शकली नाही, अशा इच्छुकांनी आता विधान परिषदेसाठी आपले नशीब आजमावण्यासाठी प्रयत्न सुरू केले आहेत. त्याशिवाय विधानसभेला पराभूत झालेले नेतेही विधानपरिषदेसाठी इच्छुक असल्याची माहिती समोर आली आहे.

चार जागांसाठी चुरस

मिळालेल्या माहितीनुसार, विधान परिषदेच्या आगामी निवडणुकीत भाजपच्या वाट्याला चार जागा येण्याची शक्यता आहे. या चार जागांसाठी भाजपमध्ये इच्छुकांची मोठी गर्दी तयार झाली आहे. यामध्ये प्रामुख्याने निंबाळकर, राम सातपुते आणि उपाध्याय यांची नावे आघाडीवर असल्याची चर्चा राजकीय वर्तुळात रंगली आहे. मे महिन्यामध्ये विधान परिषदेच्या काही जागा रिक्त होत असून, त्यासाठी भाजपने आपली रणनीती आखण्यास सुरुवात केली आहे.

जुन्या चेहऱ्यांना पुन्हा संधी मिळणार?

केशव उपाध्ये, माधवी नाईक, रणजीत सिंह निंबाळकर, राम सातपुतेंसोबतच आणखी काही परिषदेसाठी इच्छुक असल्याची माहिती सूत्रांनी दिली आहे. रणजीतसिंह मोहिते पाटील, संदीप जोशी, दादाराव केचे आणि संजय केणेकर यांच्या जागा रिक्त होणार आहेत, अशात यांच्यातून पुन्हा कोणाला संधी मिळते का? हे देखील महत्त्वाचे आहे. विधान परिषदेसाठी एप्रिलच्या तिसऱ्या आठवड्यात निवडणूक जाहीर होण्याची शक्यता आहे. विधान परिषदेच्या ९ जागा १३ मे रोजी रिक्त होणार आहेत. त्यामध्ये भाजपचा ४ जागा मिळतील, असे दिसतेय.

राज्यसभेतील हुकलेले उमेदवार शर्यतीत

ज्या नेत्यांना राज्यसभेची उमेदवारी अपेक्षित होती परंतु ती मिळू शकली नाही, त्यांनी आता आपला मोर्चा विधान परिषदेकडे वळवला आहे. पक्षाच्या वरिष्ठ नेत्यांकडे या इच्छुकांनी आपली दावेदारी मांडण्यास सुरुवात केली आहे. भाजप श्रेष्ठी आगामी निवडणुकांचे समीकरण लक्षात घेऊन कोणाच्या गळ्यात उमेदवारीची माळ टाकतात, हे पाहणे महत्त्वाचे ठरेल.