शुभम देशमुख 
भंडारा : महाराष्ट्रात सुगंधित तंबाखू विक्री आणि वाहतुकीसाठी बंदी असताना देखील छुप्या पद्धतीने याची विक्री व वाहतूक केली जात असते. हा प्रकार सर्रासपणे सुरु असून अनेकदा या विरोधात कारवाया देखील झाल्या आहेत. अशाच प्रकारे सुगंधित तंबाखूची वाहतूक केली जात असल्याचे समोर आले आहे. पोलिसांकडून २२ लाख रुपयांची सुगंधित तंबाखू पकडण्यात आली आहे. 

गुटखा, तंबाखू विक्री व वाहतुकीस बंदी घालण्यात आली आहे. असे असले तरी महाराष्ट्रात गुजरात व मध्य प्रदेशातून मोठ्या प्रमाणात गुटखा, तंबाखूची वाहतूक केली जात असते. या विरोधात पोलिसांकडून कारवाई केली जात असताना देखील वाहतूक सुरूच आहे. दरम्यान पान पराग कंपनीचा हा सुगंधित तंबाखू साठा रायपूर येथून भंडाराकडे एका ट्रकमधून आणला जात होता. याबाबतची माहिती कारधा पोलिसांना मिळाली होती. 

चालकासह एकजण ताब्यात 

मिळालेल्या माहितीवरून कारधा पोलिसांनी राष्ट्रीय महामार्गावर सापळा रचला. यानंतर माहितीनुसार तंबाखू घेऊन जाणारा ट्रक थांबवून त्याची तपासणी केली. त्यात मोठ्या प्रमाणात सुगंधित तंबाखू आढळून आला. याप्रकरणी कारधा पोलिसांनी चालक बलराम रीचोलिया (वय ४०, रा. इंदोर) आणि क्लिनर दिनेश गुजरिया (वय ३०, रा इंदोर) या दोघांना ताब्यात घेतले आहे. 

४० लाखांचा मुद्देमाल हस्तगत 

राष्ट्रीय महामार्गावरून सुगंधित तंबाखूची वाहतूक करण्यात येत असताना भंडाऱ्याच्या कारधा पोलिसांनी २२ लाखांचा सुगंधित तंबाखू पकडला. या कारवाईत सुमारे २२ लाख रुपये किमतीचा सुगंधित तंबाखूसह वाहतूक केला जाणारा ट्रक असा एकूण ४० लाखांचा मुद्देमाल जप्त केला आहे. या वर्षाची कारधा पोलिसांची ही सर्वात मोठी कारवाई आहे.