शुभम देशमुख 

भंडारा : मामाचा मृत्यू झाल्याने त्यांचा अंत्यसंस्कार आटोपून सायंकाळी घरी परतताना भाच्याचाच मृत्यू झाल्याची घटना भंडारा जिल्ह्यात घडली आहे. साकोलीच्या दिशेने दुचाकीने जात असताना भरधाव वेगात आलेल्या अज्ञात वाहनाने दुचाकीला जोरदार धडक दिली. यात या दुचाकीस्वाराचा जागीच मृत्यू झाल्याची घटना भंडारा बायपास महामार्गावर घडली आहे. 

भंडारा बायपास महामार्गावरील अझिमाबाद इथं रात्रीच्या सुमारास हा अपघात घडला आहे. यात विलास चचाने (वय ४०) यांचा घटनास्थळीच मृत्यू झाला. मृत विलास चचाने हे साकोली इथं महसूल विभागात उपविभागीय कार्यालयात अव्वल कारकून या पदावर कार्यरत होते. मृतक चचाने हे त्यांच्या मामाचा अंत्यसंस्कार आटोपून साकोलीकडं परत जात असताना हा अपघात घडला. कारधा पोलिसांनी अज्ञात वाहन चालकाविरुद्ध गुन्हा दाखल केला आहे.

चिखलमय रस्त्यावरून अनियंत्रित वाहनाला अपघात
भंडारा जिल्ह्यात सध्या भात लागवडीचा हंगाम जोमात सुरू आहे. भात लागवडी पूर्वी शेतात ट्रॅक्टरने चिखल केला जातो. त्यानंतर चिखलाने भरलेले ट्रॅक्टर मुख्य मार्गाने नेत असल्याने ट्रॅक्टरला लागून असलेला संपूर्ण चिखल रस्त्यावर पसरला जात आहे. अशाच चिखलाच्या रस्त्यावरून जाणाऱ्या सेवानिवृत्त पोलीस कर्मचारी मदन चौरागडे यांच्या वाहनाचा अपघात घडला. वाहनावरील नियंत्रण सुटलं आणि वाहन रस्त्याच्या कडेला असलेल्या शेतात तीन पलटी खात उतरली. 

सदर घटना भंडाऱ्याच्या रोहा ते मुंढरी मार्गावर घडली. यात कुठलीही जीवितहानी झाली नसली; तरी वाहनातील दोघे किरकोळ जखमी झाले आहेत. तसेच वाहनाचे मोठं नुकसान झालं आहे. सध्या भात लागवडीचा हंगाम असल्यानं शेतात चिखल करणाऱ्या ट्रॅक्टर चालकानं रस्त्यावर येण्यापूर्वी चिखल साफ करावं आणि वाहनधारकांनीही सावधतेनं वाहन चालवावं, असं आवाहन पोलीस विभागाकडून करण्यात येत आहे.