योगेश काशिद, साम टीव्ही, प्रतिनिधी

बीडमध्ये शिवराज दिवटे या तरुणाला काल मारहाण झाली. दहा-बारा जणांच्या टोळक्याने लाठ्या-काठ्यांनी शिवराजला मारहाण केली. ही घटना ताजी असतानाच आणखी एका घटनेमुळे बीडमध्ये खळबळ उडाली आहे. सोलापूरहून बीडकडे येणाऱ्या एसटी बसमध्ये महिलांची छेड काढण्यात आल्याची माहिती समोर आली आहे.

मिळालेल्या माहितीनुसार, सोलापूरहून बीडकडे येणाऱ्या एसटी बसमध्ये बसलेल्या महिलांची छेड काढण्यात आली. या महिलांनी त्यांच्या नातेवाईकांना फोनवर घटलेल्या प्रकाराची माहिती दिली. बीड शहरातील बार्शी नाका परिसरात ही बस दाखल होताच नातेवाईकांनी बसच्या समोरच्या बाजूला असलेल्या काचेवर दगडफेक सुरु केली. त्यांनी एसटी बसच्या काचा फोडण्याचा प्रयत्न केला.

एसटी बसवर झालेल्या दगडफेकीमुळे मोठा गोंधळ उडाला. त्यानंतर बीड शहरात आहे त्याच ठिकाणी एसटी बसेस थांबवण्यात आल्या आहेत. बस स्थानकातील बस सेवा ठप्प झाली आहे. या संपूर्ण प्रकरणात पेड बीड पोलीस ठाण्यात गुन्ह्याची नोंद करण्याची प्रक्रिया सुरु आहे. पोलिसांकडून या घटनेचा तपास सुरु झाला आहे.

सोलापूरवरुन बीडमध्ये परत असलेली एसटी बसमध्ये बसलेल्या महिलांची छेड काढण्याची माहिती समोर आली. यानंतर महिलांच्या नातेवाईकांनी गर्दी करत त्या एसटी बसवर दगडफेक केली. संतप्त नातेवाईकांना बसच्या काचा फोडण्याचा प्रयत्न केला. दगडफेकीनंतर बीडमधील बस स्थानकातील बस सेवा ठप्प झाल्याचे म्हटले जात आहे.