योगेश काशिद, साम टीव्ही, प्रतिनिधी

Beed : बीडमधील एक व्हिडीओ सध्या सोशल व्हिडीओवर प्रचंड व्हायरल होत आहे. या व्हिडीओमध्ये एका महिलेला मारहाण होत असल्याचे पाहायला मिळत आहे. हा व्हिडीओ बीडच्या केज तालुक्यातील एका गावातील असल्याची माहिती समोर आली आहे. उसने पैसे न दिल्याने महिलेला मारहाण झाल्याचे म्हटले जात आहे.

मिळालेल्या माहितीनुसार, उसनवारी दिलेले पैसे परत मागितल्याने चंद्रकला गदळे या महिलेला घरी जाऊन मारहाण झाली. केजमधील दहिफळ वडमाऊली गावातील सुशील गदळे यांनी डोईफोडवाडी येथील सतीश डोईफोडे याला ट्रक खरेदी करण्यासाठी उसनवारी पैसे दिले होते. सुशील गदळे यांनी दिलेले पैसे परत मागितले.

उसनवारी दिलेले पैसे मागितल्याच्या रागातून सतीश डोईफोडेची पत्नी कालींदा डोईफोडेने दहिफळ वडमाऊली गावात जाऊन सुशील गदळे यांच्या आई चंद्रकला गदळे यांना लाथा बुक्क्यांनी मारहाण केली. 'तुमचे घेतलेले पैसे आम्ही परत देणार नाही' असे म्हणत कालींदा डोईफोडेने चंद्रकला गदळे यांना मारहाण केली. या प्रकरणी कालींदा डोईफोडेच्या विरोधात केज पोलीस स्थानकामध्ये गुन्हा दाखल करण्यात आला आहे.

बीडमध्ये गुंडाराज

बीडमध्ये एका माजी सरपंचाने तरुणावर कोयत्याने जीवघेणा हल्ला केल्याची घटना समोर आली आहे. तरुणाच्या डोक्यावर कोयत्याने सपासप वार करण्यात आले आहेत, शेत रस्त्याच्या वादातून ही घटना घडल्याचे म्हटले जात आहे. या प्रकरणानंतर पोलिसांनी माजी सरपंच याच्यावर कारवाई करत त्याला न्यायालयात हजर केले आहे.