योगेश काशिद, साम टीव्ही, प्रतिनिधी

Beed : बीड जिल्ह्यामध्ये एक दु:खद घटना घडली आहे. बीड जिल्ह्यातील परळीजवळील एका पेट्रोल पंपाशेजारी भीषण अपघात झाला. या अपघातामध्ये माजी सरपंच आणि त्याच्या नातीचा जागीच मृत्यू झाल्याची माहिती समोर आली आहे. अपघातामध्ये सरपंच यांची पत्नी गंभीर जखमी असून त्यांना रुग्णालयात दाखल करण्यात आले आहे.

मिळालेल्या माहितीनुसार, बीडच्या परळी जवळ असलेल्या पांगरी नाथरा मार्गावर पेट्रोल पंपाजवळ आज (१० सप्टेंबर) सायंकाळी भीषण अपघात झाला. या भीषण अपघातामध्ये जळगाव तांडा येथील माजी सरपंच वसंत ताराचंद चव्हाण (वय - ५५ वर्षे) आणि त्यांची नात श्रुती विजय चव्हाण (वय - ८ वर्षे) यांचा जागीच मृत्यू झाला.

अपघातामध्ये वसंत चव्हाण यांची पत्नी कस्तुराबाई चव्हाण या गंभीररित्या जखमी झाल्या. त्यांना तातडीने जवळच्या रुग्णालयात दाखल करण्यात आले. त्यांच्यावर उपचार सुरु असल्याचे म्हटले जात आहे. परळीतील एका खासगी रुग्णालयाहून गावाकडे परतत असताना चव्हाण कुटुंबाचा अपघात झाला. या घटनेमुळे जळगाव तांडा परिसरात शोककळा पसरली आहे.

श्रुती चव्हाण हीच्यावर परळीतील एका खासगी रुग्णालयात उपचार सुरु होते. उपचार करुन झाल्यानंतर वसंत चव्हाण, त्यांची पत्नी कस्तुराबाई चव्हाण आणि त्यांची नात श्रुती चव्हाण हे गावीच्या दिशेने निघाले होते. घरी परतताना त्यांचा अपघात झाला. अपघाताची माहिती मिळताच पोलिसांनी घटनास्थळी धाव घेतली आणि पुढील तपास सुरु केला.