बीड : बीडच्या चकलांबा येथे एका तरुणाला मारहाण झाल्याची घटना घडली आहे. जमावाकडून मारहाण झाल्याने तरुण यात जखमी झाला असून गावात तणावाचे वातावरण निर्माण झाले आहे. दरम्यान तरुणाच्या मारहाणीच्या घटनेनंतर ग्रामस्थ संतप्त झाले असून पोलीस ठाण्यासमोर ठिय्या आंदोलन करत मारहाण करणाऱ्यांना अटक करण्याची मागणी केली आहे. 

बीड जिल्ह्यातील चकलांब या गावातील गोपाल उनवणे या तरुणास मारहाण करण्यात आली आहे. जमावाने पोलीस ठाण्याच्या आवारातच मारहाण केल्याची घटना रात्री घडली आहे. यामुळे तरुण जखमी झाला असून त्याला उपचारासाठी रुग्णालयात दाखल करण्यात आले आहे. दरम्यान या प्रकरणात चकलांबा पोलिस ठाण्यात गुन्हा दाखल करण्यात आला आहे. मात्र मारहाण करणारे सापडलेले नाहीत. 

पोलीस ठाण्याबाहेर ठिय्या 

पोलिसात गुन्हा दाखल झाला असता तरी आता मारहाण करणाऱ्या आरोपींना तत्काळ अटक करावी; या मागणीसाठी ग्रामस्थांनी पोलीस ठाण्याच्या बाहेर आंदोलन सुरू केले आहे. जोपर्यंत आरोपींना अटक केले जात नाही, तोपर्यंत हे आंदोलन सुरूच ठेवण्याचा निर्धार या ग्रामस्थांनी केला आहे. तसेच यावेळी ग्रामस्थांनी जोरदार घोषणाबाजी देखील केली आहे. आता ग्रामस्थांच्या आंदोलनानंतर पोलीस काय भूमिका घेतात हे पाहणे महत्वाचे आहे. 

गावातील बाजारपेठ बंद 

गावातील तरुणाला नाहक मारहाण झाल्याच्या कारणावरून गावातील नागरिकांनी आक्रमक भूमिका घेतली आहे. ठिय्या आंदोलन करण्यासोबतच या मारहाणीच्या निषेधार्थ चकलांबा गावातील बाजारपेठ देखील बंद करण्यात आली आहे. यामुळे नेहमी वर्दळ असलेल्या बाजारपेठेत आज शुकशुकाट पाहण्यास मिळत आहे. सध्या गोपाल उनवणे या तरुणावर बीडच्या जिल्हा रुग्णालयात उपचार सुरू आहेत.