भरत मोहळकर, साम प्रतिनिधी

सरपंच संतोष देशमुख हत्या प्रकरणाने चर्चेत असलेल्या वाल्मिक कराडबाबत दररोज नवनवे खुलासे समोर येत आहेत. वाल्मिक कराडने ऊस तोडणीच्या हार्वेस्टरसाठी 36 लाखांचं अनुदान मिळवण्याचं अमिष दाखवून तब्बल 141 शेतकऱ्यांकडून प्रत्येकी 9 लाख रुपये याप्रमाणे कोट्यावधी रुपये उकळल्याचा गंभीर आरोप शेतकऱ्याने केलाय.

एवढंच नाही तर कराडने शेतकऱ्यांना धनंजय मुंडेंची भेट घालून दिल्याचा व्हिडीओही शेअर करण्यात आलाय.. पंढरपूरमध्ये फसवणूक झालेल्या 19 हार्वेस्टर मालकांचे जबाब नोंदवण्यात आल्याने कराडचा पाय आणखी खोलात गेलाय. 141 हार्वेस्टरच्या अनुदानासाठी कराडने 5 हजार 141 लोकांकडून कोट्यावधी रुपये उकळल्याचा आरोप करत धसांनी कराडसह मुंडेंवर निशाणा साधलाय.

कराडचा नवा कारनामा

सरपंच संतोष देशमुख हत्या प्रकरणानंतर वाल्मिक कराड वेगवेगळ्या प्रकरणात अडचणीत आलाय.. ही प्रकरणं नेमकी कोणते आहेत? पाहूयात.

कराडचे कारनामे

सरपंच हत्या प्रकरणाशी संबंधित आवादा कंपनीकडून 2 कोटीच्या खंडणी प्रकरणी सीआयडी कोठडी

सुरेश धसांनी संपत्तीबाबत खुलासे केल्यानंतर कराड ईडीच्या निशाण्यावर

हार्वेस्टर अनुदानाचं अमिष दाखवून कोट्यावधींच्या घोटाळ्याचा आरोप

वाईन शॉप लायसन्सबाबत दमानियांचे कराडवर गंभीर आरोप

वाल्मिक कराडचा शस्त्र परवाना रद्द

एकीकडे सरपंच संतोष देशमुख हत्या प्रकरणी वाल्मिक कराडवर संशय व्यक्त केला जातोय. त्यातच आता थेट धनंजय मुंडेंच्या जवळीकीचा संदर्भ देऊन शेतकऱ्यांकडून कोट्यावधी रुपये उकळल्याचं प्रकरण समोर आल्याने आता कराडवर आणखी एक गुन्हा दाखल होण्याची शक्यता आहे. त्यामुळे मुख्यमंत्री हार्वेस्टर घोटाळ्याची चौकशी करणार का? आणि कराड दोषी असेल तर त्याला शिक्षा होणार का? याकडे लक्ष लागलंय.