बीड : बीडसह जिल्ह्यातील अनेक भागात आज सकाळपासूनच पावसाची संततधार सुरू आहे. या पावसामुळे लागवड केलेल्या कापसासह खरीपातील पिकांना वाढीसाठी दिलासा मिळाला आहे. तर दुसरीकडे शहरातील सखल भागात पाणी साचल्याने रस्त्यावरून जाणाऱ्या नागरिकांसह वाहनधारकांचे हाल सुरू आहेत.

दुष्काळाचा सामना करणाऱ्या (Beed) बीड जिल्ह्यात यंदा वरुणराजाची कृपादृष्टी झाली आहे. १ जूनपासून बीडसह जिल्ह्यातील अनेक भागात समाधानकारक पाऊस झाला आहे. त्या जोरावर शेतकऱ्यांनी खरिपाच्या पेरण्या उरकल्या आहेत. दरम्यान आज सकाळपासून पावसाची संततधार सुरु आहे. संततधार (Rain) पावसामुळे जनजीवन विस्कळीत झाले आहे. बीड शहरातील सखल भागात तसेच रस्त्यांवर पावसाचे पाणी साचले आहे. 

सकाळपासून पावसाची संततधार सुरु आहे. मात्र अद्यापही प्रकल्पीय पाणीसाठा जैसे थे आहे..त्यामुळं मोठ्या पावसाच्या प्रतीक्षेत बीडकर आहेत. तर बीड नगरपालिकेने नाल्यांची सफाई न केल्याने पावसाच्या पाण्यामुळे नाल्यातील कचरा रस्त्यावर पसरल्याचे चित्र बीडमध्ये पाहायला मिळत आहे. तर पावसाचा जोर वाढल्यास नाल्यांचे पाणी रस्त्यावर येण्याची शक्यता अधिक निर्माण झाली आहे.