योगेश काशिद, बीड

बीडमध्ये शेजारच्यांच्या जाचाला कंटाळून एका विवाहित महिलेने आत्महत्येचा प्रयत्न केल्याची धक्कादायक घटना समोर आली आहे. गेवराईतील सावता नगरमध्ये ही घटना घडली. अंगावर डिझेल ओतून या महिलेने स्वत:ला पेटवून घेतलं. या घटनेत महिला ८० टक्के भाजली. महिलेची प्रकृती चिंताजनक असून तिला उपचारासाठी रुग्णालयात दाखल करण्यात आले आहे. या घटनेमुळे बीडमध्ये खळबळ उडाली आहे.

मिळालेल्या माहितीनुसार, बीडच्या गेवराई तालुक्यातील सावतानगर भागामध्ये ही घटना घडली. आमच्या मालकी हक्काच्या जागेमध्ये गटाराचे पाणी का सोडता? या कारणावरून पीडित महिला आणि शेजारच्यांमध्ये सतत भांडण होत होते. शेजारी राहणारे या महिलेसोबत सतत भांडण करत तिला जीवे मारण्याची धमकी देत होते. याच त्रासाला कंटाळून महिलेने आत्महत्येचा प्रयत्न केला.

शेजारच्यांच्या त्रासाला कंटाळून नवविवाहित स्वाती पारखे या महिलेने अंगावरती डिझेल टाकून स्वतःला पेटवून घेतलं. या घटनेत पीडित महिला ८० टक्के भाजली असून तिच्यावर बीडच्या जिल्हा रुग्णालयामध्ये उपचार सुरू आहेत. 'माझ्या जीवाचं काही बरं वाईट झाल्यास हे लोक जबाबदार असतील असा जबाब या महिलेने पोलिसांना दिला आहे.

याप्रकरणी विष्णू घोडके, कमलबाई घोडके, सखुबाई मस्के, भीमराव दाभाडे, नंदा मस्के, मंगल मस्के, सुनीता मस्के, कैलास मस्के, राहुल मस्के, द्वारकाबाई मस्के आणि कांताबाई टाक या सर्वांविरोधात तक्रार दाखल करण्यात आली आहे. पोलिस या प्रकरणाचा तपास करत आहेत.