योगेश काशिद, साम टीव्ही, प्रतिनिधी

Beed : बीडच्या गेवराई तालुक्यातील लुखामसला येथील माजी उपसरपंचाने स्वत:ला गोळ्या झाडून आत्महत्या केल्याची धक्कादायक घटना समोर आली आहे. या प्रकरणात मोठी अपडेट समोर आली आहे. उपसरपंचाच्या नातेवाईकांनी ही आत्महत्या नसून हत्या असल्याची तक्रार पोलिसांमध्ये दिली आहे. नर्तिका पूजा गायकवाडने उपसरपंचाचा बळी घेतल्याचे म्हणत नातेवाईकांनी फिर्यादीत पूजाचे आरोपी म्हणून नाव नमूद केले आहे.

गोविंद बर्गे हे लुखामसला गावचे माजी उपसरपंच होते. ते गुत्तेदारीचे काम पाहत होते. त्याचबरोबर बर्गे यांचा प्लॉटिंगचा व्यवसाय असल्याची माहितीदेखील समोर आली आहे. ते गेवराईचे आमदार विजयसिंह पंडित आणि अमरसिंह पंडित यांचे कार्यकर्ते देखील होते. त्यांच्या मृत्यूच्या बातमीने मोठी खळबळ उडाली आहे.

गोविंद बर्गे यांचा जीव नर्तिका पूजा गायकवाडमुळे गेल्याचा आरोप बर्गे यांच्या नातेवाईकांनी केला आहे. गेवराईमधील बंगला नावावर करुन दे, भावाच्या नावावर शेती करुन दे नाहीतर खोटा बलात्काराचा गुन्हा दाखल करेन अशी धमकी पूजाने गोविंद बर्गे यांना दिली होती. पूजाने अनेकदा पैश्यांसह प्राॅपर्टीची मागणी देखील केली होती, अशी माहिती फिर्यादीमध्ये आहे.

नर्तिका पूजा गायकवाडच्या वाढणाऱ्या अपेक्षा आणि त्यानंतर थेट बलात्काराचा खोटा गुन्हा दाखल करुन तुला केसमध्ये गुंतवेन या धमकीमुळे माजी उपसरपंच गोविंद बर्गे यांनी टोकाचे पाऊल उचलले असावे असे बोलले जात आहे. गोविंद बर्गे यांच्याकडे कधीही पिस्टल नव्हते, ते कधी साधी काठीही सोबत घेऊन फिरत नसत. मग त्यांनी गोळी कशी-काय घालून घेतली असा सवाल नातेवाईकांनी केला आहे. ही आत्महत्या नसून घातपात असल्याचा दावा बर्गे यांच्या नातेवाईकांनी केला आहे.