बीडमध्ये दिवसेंदिवस गुन्हेगारी घटनांमध्ये वाढ होत असल्याचं चित्र आहे. अशातच गेवराईमधील एका घटनेमुळे परिसरात खळबळ उडाली आहे. लुखामसला येथील उपसरपंच यांची हत्या करण्यात आली आहे. गोळीबारात त्यांचा मृत्यू झाला आहे. ही घटना मंगळवारी उघडकीस आली. दरम्यान, आत्महत्या आहे की हत्या? याचे कारण अस्पष्ट असून, पुढील तपास पोलिसांकडून सुरू आहे.

गोविंद जगन्नाथ बरगे (वय वर्ष ३८) (गेवराई, लुखामसला गाव) असे मृत उपसरपंच यांचे नाव आहे. सोमवारी बरगे खासगी कामानिमित्त सोलापुरातील बार्शीमध्ये गेले होते. याठिकाणी ते चारचाकी वाहनाने गेले होते. मात्र, मंगळवारी सकाळी सासुरे गावातील शिवारात कारमध्येच त्यांचा मृतदेह आढळला. यामुळे गावात काहीवेळ खळबळ उडाली.

या घटनेची माहिती तातडीने स्थानिकांनी पोलिसांना दिली. घटनेची माहिती मिळताच वैराग पोलीस ठाण्याचे सहाय्यक पोलीस निरीक्षक कुंदन गावडे यांनी पोलीस पथकासह घटनास्थळ गाठले. पोलिसांनी पंचनामा करून मृतदेह ताब्यात घेतला.

दरम्यान, पोलिसांनी तपास केला असता गोविंद बरगे यांच्या डोक्याला गोळी लागली असल्याचे आढळून आले. पोलिसांनी त्यांची कार तपासली असता, त्यांच्या कारमध्ये पिस्तूल निदर्शनास आली. बरगे यांनी आत्महत्या केली? की त्यांची हत्या करण्यात आली आहे का? याचे कारण अस्पष्ट असून, पुढील तपास पोलिसांकडून सुरू आहे. या घटनेमुळे बरगे कुटुंबावर दुखा:चा डोंगर कोसळला आहे.