बीडच्या वडवणी येथून एक धक्कादायक बातमी समोर येत आहे. प्राथमिक आरोग्य केंद्रातील वैद्यकीय अधिकारी डॉ. शुभम यादव यांचा संशयास्पद मृत्यू झाला आहे. त्यांचा मृतदेह गणेश विसर्जनाच्या दिवशी तलावात आढळून आला. यामुळे परिसरात काहीवेळ खळबळ उडाली होती. हा घातपात आहे की आत्महत्या? याबाबत गावात चर्चा सुरू आहे. या घटनेनंतर परिसरात खळबळ उडाली आहे.

डॉ. शुभम यादव असे मृत व्यक्तीचे नाव आहे. वडवणी येथील प्राथमिक आरोग्य केंद्रात ते कार्यरत होते. शनिवारी राज्यात विसर्जन सोहळा पार पडला. भक्तीभावाने भक्तांनी गणरायाला निरोप दिला. मात्र, बीडच्या वडवणीत एक भयंकर प्रकार उघडकीस आला. त्यांचा मृतदेह थेट तलावात आढळला.

मिळालेल्या माहितीनुसार, डॉ. शुभम यादव (वय अंदाजे २५), हे मुळचे अंबाजोगाई तालुक्यातील देवळा येथील रहिवासी आहेत. २०२२ ते २०२३ पासून वडवणी येथे वैद्यकीय अधिकारी म्हणून रुजू झाले होते. काल, गणेश विसर्जनाच्या दिवशी सकाळपासून ते बेपत्ता असल्याची माहिती त्यांच्या नातेवाईकांनी दिली होती.

नातेवाईकांनी त्यांना गावभर शोधलं. मात्र, डॉक्टर काही सापडले नाहीत. त्यानंतर त्यांचा थेट मृतदेह शहरातील तलावात आढळल्याने सर्वांनाच धक्का बसला. गावकऱ्यांनी तातडीने पोलिसांना याची माहिती दिली. डॉ. यादव यांची हत्या आहे की आत्महत्या? या दिशेनं सध्या पोलिसांकडून तपास सुरू आहे. पोलिसांनी मृतदेह बाहेर काढत शवविच्छेदनासाठी रूग्णालयात पाठवले.

शवविच्छेदन अहवाल समोर आल्यानंतर मृत्यूचे नेमके कारण समोर येईल, असं पोलिसांनी सांगितले. या घटनेमुळे आरोग्य विभाग आणि स्थानिक प्रशासनातही शोककळा पसरली आहे. पोलीस पुढील तपास करत आहेत.