बीड : अल्पवयीन मुलांना कामावर ठेवणे हा गुन्हा मानला जातो. मात्र बीडमध्ये व्यापाऱ्यांनी अल्पवयीन मुलांना कामाला ठेवल्याचा आणि काही महिलांकडून भीक मागण्यासाठी वापर केला जात होता. त्यानुसार अल्पवयीन बालकांचा भीक मागण्यासाठी वापर करणाऱ्या ४ महिलांसह दुकानावर अल्पवयीन मुलांना कामावर ठेवणाऱ्या व्यापाऱ्याला बीड पोलिसांनी चांगलाच दणका दिला आहे. त्यांच्यावर गुन्हा दाखल करण्यात आला आहे. 

अनेक ठिकाणी लहान मुलांना हॉटेल, चहाची टपरी, यासह वेगवेगळ्या ठिकाणी कामावर ठेवले जात असते. यासाठी राज्यात पोलिस प्रशासनाकडून ऑपरेशन मुस्कान मोहिम राज्यभरात राबविली जात आहे. या अंतर्गत बालकामगारांची मुक्तता, हरवलेल्या मुलांचा शोध, पीडित मुलांचा शोध आता पोलीस प्रशासनाकडून चालू आहे. बीड पोलिसांकडून देखील हि मोहीम राबविण्यात आली आहे. या मोहिमेत बीडमध्ये अल्पवयीन मुलांकडून भीक मागणे व बालकामगार आढळून आले आहेत. 

दरम्यान बीड पोलीस अधीक्षक कार्यालयातील अनैतिक मानवी वाहतूक कक्षाच्या एपीआय वर्षा व्हगाडे व सामाजिक कार्यकर्ते तत्वशील कांबळे यांच्यासह कर्मचाऱ्यांनी मोहिमेअंतर्गत कारवाई केली आहे. बीड शहरात ५ लहान मुलांचा भिक मागण्यासाठी वापर करणाऱ्या महिलांवर कारवाई केली आहे. या प्रकरणी पेठ बीड पोलिसांत सोनल लोढे, काशाबाई भोसले, जालनबाई काळे, सीमा गायकवाड या ४ महिलांवर गुन्हा नोंद केला आहे. 

दोन व्यापाऱ्यांवर गुन्हा दाखल 

त्याचप्रमाणे या मोहिमेअंतर्गत बीड शहर पोलिसांनी शहरातील भाजी मंडई परिसरातून दोन बालकामगारांची सुटका केली आहे. भाजी मंडईमध्ये हे बालकामगार व्यापाऱ्यांकडे कमला होते. लहान मुलांना कामावर ठेवणाऱ्या जुबेर शेख व संजय खंडागळे या २ व्यापाऱ्यांवर गुन्हा नोंद केला आहे. बीड शहरात या दोन्ही प्रकरणांचा आता पोलिसांकडून तपास करण्यात येत आहे.