Beed News: महिलांवरील अन्याय अत्याचाराच्या घटना थांबता थांबत नाहीयेत. बीडमधून क्रूरतेचा कळस गाठणारी एक धक्कादायक घटना समोर आली आहे. 5 वर्षाच्या चिमूकलीवर 52 वर्षाच्या नराधमाने लैंगिक अत्याचार केलाय. ही संतापजनक घटना बीडच्या केज पोलीस ठाण्याच्या हद्दीत घडलीय. तर पीडित चिमुकलीवर बीडच्या जिल्हा रुग्णालयात उपचार सुरू आहेत. (Latest Marathi News)

पोलिसांनी दिलेल्या माहितीनुसार, केज पोलीस ठाण्याच्या हद्दीतील एका गावामध्ये मजुरी करून जगणाऱ्या कुटुंबातील चिमुकलीवर अत्याचार करण्यात आला आहे. पीडित चिमुकली शेजारी राहणाऱ्या नराधम आरोपी अण्णा उर्फ अरुण याच्या नातवंडा सोबत खेळत होती.

खेळत असताना अरुणने या चिमुकलीस घरात बोलावून घेत तिच्यावर लैंगिक अत्याचार केला. याप्रकरणी पीडित चिमुकलीच्या आईच्या फिर्यादीवरून नराधमा आरोपीविरोधात कलम 376 अब, 4 (2) बाललैंगिक अपराध संरक्षण अधिनियम 2012 कलम 8 प्रमाणे गुन्हा दाखल करण्यात आला आहे.

या घटनेनं केज तालुक्यात संतापाची लाट उसळली आहे. लहान मुलं लैंगिक अत्याचाराचे बळी ठरण्याचे प्रमाण देखील वाढत चालले आहे. ५ वर्षांच्या चिमुकल्या मुलीवर देखील अत्याचाराच्या घटना घडतायत. या सर्वांमध्ये आपल्या मुलांना चांगला आणि वाईट स्पर्श याची महिती असणे गरजेचे आहे. अनेक पालक आता आपल्या पाल्यांना विशेषता मुलींना चांगल्या आणि वाईट स्पर्शाची माहिती देतात.