बीड : मागील महिना- दीड महिन्यापूर्वीपासून शासकीय रुग्णालयात औषधींचा तुटवडा जाणवत आला आहे. यात आता बीडच्या (Ambajogai) अंबाजोगाई येथील स्वामी रामानंद तीर्थ वैद्यकिय रुग्णालयात (Hospital) औषधांचा तुटवडा निर्माण झाला आहे. यामुळे येथील रुग्णांना वेळेवर औषधी उपलब्ध होत नसल्याने त्यांना बाहेर जावे लागत आहे. (Live Marathi News)

औषधींचा तुटवडा जाणवत असल्याने नांदेडच्या शासकीय रुग्णालयात दाखल रुग्णांना जीव गमवावा लागल्याची घटना मागील महिन्यात घडली होती. यानंतर काही दिवस औषधी पुरवठा चांगला झाला. मात्र आता बीड जिल्ह्यात औषधींचा तुटवडा जाणवू लागला आहे. रुग्णांना वेळेवर औषधी, गोळ्या मिळत नसल्यामुळे गैरसोय होत आहे. त्यामुळे तात्काळ गोळ्या औषध उपलब्ध करून द्यावी; अशी मागणी आमदार नमिता मुंदडा यांनी वैद्यकीय शिक्षणमंत्री हसन मुश्रीफ यांच्याकडे केली आहे.

('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)

वर्षभरापासून समस्या 
स्वाराती रुग्णालयात सर्वसामान्य रुग्ण उपचार घेण्यासाठी येतात. रुग्णालयातील डॉक्टर रुग्णांची तपासणी करून त्यांना औषधी लिहून देतात. मात्र औषध वाटप विभागात औषधांचा साठा संपल्याने रुग्णांना स्वतःच्या पैशाने औषधी घ्यावी लागतात. या विभागात मागील एक वर्षापासून कुठल्याही साहित्याचा पुरवठा नसल्यामुळे रुग्णांवर प्रभावी उपचार होत नाहीत. विशेतः दंत विभागात औषधी, गोळ्या व इंजेक्शन काहीच उपलब्ध नाही.