• बीडमध्ये भीषण रस्ते अपघात

• टेम्पोची दुचाकीला जोरदार धडक

• अपघातामध्ये दुचाकीवरील दोन तरुणाचा मृत्यू

• एक जण गंभीर जखमी झाला असून त्याच्यावर उपचार सुरू आहेत

योगेश काशिद, बीड

बीडमध्ये भीषण रस्ते अपघातामध्ये दोन तरुणांचा जागीच मृत्यू झाला. बीडच्या कन्हेरवाडी घाटात ही घटना घडली. भरधाव टेम्पोने दुचाकीला जोरदार धडक दिली. टेम्पोच्या चाकाखाली चिरडून दोघांचा मृत्यू तर एक जण गंभीर जखमी झाला. या अपघातामध्ये दुचाकीला धडक दिल्यानंतर टेम्पो रस्त्यावर उलटला. या अपघाताचा तपास पोलिस करत आहेत. जखमीवर रुग्णालयात उपचार सुरू आहेत.

मिळालेल्या माहितीनुसार, कन्हेरवाडी घाटात भरधाव टेम्पोने दुचाकीला धडक दिली. ही धडक इतकी जोरात होती की दुचाकीवरील दोन तरुण दूरवर फेकले गेले. या अपघातामध्ये गंभीर जखमी झालेल्या तरुणांचा जास्त रस्तस्राव झाल्याने जागीच मृत्यू झाला. या अपघातामध्ये एक जण गंभीर जखमी झाला असून त्याच्यावर अंबाजोगाई येथील रुग्णालयात उपचार सुरू आहेत. ही घटना मंगळवारी रात्री साडेआठ वाजताच्या सुमारास घडली. या घटनेत दोन जिवलग मित्रांचा मृत्यू झाल्याने हळहळ व्यक्त केली जात आहे.

पोलिसांनी सांगितले की, मंगळवार रात्री साडेआठ वाजण्याच्या सुमारास शहरातील सावतामाळी नगर भागात राहणारे गणेश मुरुळे, गणेश खोले आणि मुंजा मिसाळ हे ३ तरुण दुचाकीवरून प्रवासकरत होते. कामानिमित्त ते अंबाजोगाईकडे जात असताना भयंकर घडलं. कन्हेरवाडी घाटात हॉटेल नंदनवनजवळ त्यांच्या दुचाकीला एका टेम्पोने जोरात धडक दिली. या भीषण अपघातात गणेश मुरुळे, मुंजा मिसाळ आणि गणेश खोले हे गंभीर जखमी झाले. नागरिकांनी त्यांना परळी वैजनाथ येथील उपजिल्हा रुग्णालयात नेले.

पण डॉक्टरांनी तपासून गणेश मुरुळे, मुंजा मिसाळ यांना मृत घोषित केले. या अपघातामध्ये गणेश खोले हा गंभीर जखमी झाला असून त्याला तातडीने अंबाजोगाई येथील शासकीय रुग्णालयात दाखल करण्यात आले आहे. त्याची प्रकृती चिंताजनक आहे. याअपघाताचा तपास अंबाजोगाई पोलिस करत आहे. या तरुणाच्या मृत्यूची बातमी कळताच त्यांच्या कुटुंबीयांच्या पायाखालची जमीन सरकली.