प्रसाद नायगावकर

यवतमाळ  : नवी मुंबई आंतरराष्ट्रीय विमानतळाच्या नावाने राजकारण तापले असताना मुंबई विमानतळाला स्वर्गीय वसंतराव नाईक यांचे नाव द्यावे अशी यवतमाळ येथील बंजारा नेत्यांची मागणी समोर आली आहे. शिवसेनाप्रमुख बाळासाहेब ठाकरे यांचे नाव विमानतळाला देण्यावर शिवसेना ठाम आहे. मात्र लोकनेते दि.बा.पाटील यांचे नाव देण्यात यावे यासाठी स्थानिक नागरिक आक्रमक झाले असतानाच आता या वादात स्वर्गीय वसंतराव नाईक यांचे नाव जोडले जात आहे. Banjara leaders demand New Mumbai airport be named after Vasantrao Naik

हे देखील पहा -

वसंतराव नाईक यांनी महाराष्ट्राचे सतत साडे अकरा वर्षे मुख्यमंत्री पद भूषविले आहे. वसंतराव नाईकांना हरित क्रांतीचे जनक मानले जाते. शिवाय नवी मुंबई निर्माण करण्यामध्ये देखील त्यांचे मोठे योगदान आहे.

रोजगार हमी योजना हे त्यांचीच देण मानली जाते. अश्या विविध कल्याणकारी कार्यातून महाराष्ट्राच्या विकासामध्ये मोलाचा वाट असलेल्या वसंतराव नाईक यांचे नाव नवी मुंबई आंतरराष्ट्रीय विमानतळाला देण्यात यावे अशी मागणी आता बंजारा समाजातील नेते करू लागले आहेत.

वसंतराव नाईक हे अजूनही बंजारा समाजासाठी दैवतच आहेत. बंजारा समाजाचे असलेले माजी वनमंत्री संजय राठोड याना पूजा चव्हाण प्रकरणात काही महिन्यापूर्वी राजीनामा द्यावा लागला होता. आज घडीला ठाकरे मंत्रीमंडळात बंजारा समाजाचा एकही प्रतिनिधी नाही. महाराष्ट्रात जवळपास दीड कोटी बंजारा समाजाचे लोक आहेत.

असे असूनही समाजास प्रतिनिधित्व नाही यामुळे आघाडी सरकारवर समाज काहीसा नाराज असून मुख्यमंत्रांकडे आम्ही नामांतरामध्ये स्वर्गीय वसंतराव नाईक यांचा विचार करुन नवी मुंबई आंतरराष्ट्रीय विमानतळाला त्यांचेच नाव द्यावे अशी समाजाची मागणी असल्याचे घुमंतूक महासभा प्रदेश अध्यक्ष मनीष जाधव यांनी म्हटले आहे.

Edited By : Krushnarav Sathe