परभणी : जिल्ह्यात बैलपोळ्याच्या (Bail Pola) सण बळीराजाने मोठ्या उत्सवात साजरा केला. अशात जिंतूर तालुक्यात बैलपोळ्याच्या सणाला गालबोट लागलं. बैलपोळा साजरा करण्यावरून जिंतूर (Jintur) तालुक्यातील चांदज गावात दोन गटांमध्ये वाद झाला. हा वाद इतका विकोपाला गेला की, दोन्ही गटातील नागरिकांनी एकमेकांना लाथा-बुक्यांनी मारहाण केली. ही घटना सायंकाळी पाच वाजेच्या सुमारास घडली. (Parbhani Jintur Todays News)

दोन गटात झालेल्या या मारहाणीचा व्हिडिओ देखील समोर आला आहे. प्राप्त माहितीनुसार, बैलपोळा फोडण्यावरून ही हाणामारी झाली. या घटनेत दोन्ही गटातील चार ते पाच जण जखमी झाले असल्याची माहिती आहे. जिंतूर तालुक्यातील चांदज येथे पोळ्याच्या सणानिमित्त गावातून बैलाची मिरवणूक काढण्यात आली होती. मिरवणूक संपल्यानंतर दोन्ही गटात वाद झाला.

दरम्यान, हा वाद इतका विकोपाला गेला की, वादाचे रूपांतर हाणामारीत झालं. दोन्ही गटाकडून एकमेकांना शिवीगाळ करत, दगड, वीट तसेच लाठ्या काठ्यांनी मारहाण केली. या घटनेत ४ ते ५ जण जखमी झाले आहे. जखमींपैकी गणेश साहेबराव अंभुरे आणि बालासाहेब पाराजी अंभुरे या दोघांची प्रकृती गंभीर आहे. (Jintur ChandajTodays News)

दोघांनाही प्राथामिक उपचारानंतर पुढील उपचारासाठी परभणी येथे हलविण्यात आले आहे. या घटनेची माहिती मिळताच बोरी पोलीस ठाण्याचे सहायक पोलीस निरीक्षक वसंत मुळे यांनी पोलीस पथकासह तातडीने चांदज गावात धाव घेऊन परिस्थिती नियंत्रणात आणली.

सध्या चांदज गावात पोलिसांनी चोख पोलीस बंदोबस्त ठेवला आहे. याप्रकरणी पोलिसांनी आतापर्यंत २० ते २५ जणांचा ताब्यातही घेतलं आहे. याबाबत गुन्हा दाखल करण्याची प्रक्रिया सुरू असल्याची माहिती पोलिसांकडून मिळाली आहे.

Edited By - Satish Daud