जेजुरी : स्वातंत्र्य दिनाचे औचित्य साधून अवघ्या महाराष्ट्राचं कुलदैवत असणाऱ्या खंडेरायाच्या जेजुरी गडावर आकर्षक फुलांची सजावट करण्यात आली आहे. मंदिराच्या गाभाऱ्यात तिरंगी फुलांची आकर्षक अशी आरास करण्यात आली आहे.

कोरोनामुळे मंदिरे बंद असली तरी नित्य पूजा पाठ सुरू आहेत. आज देवस्थानच्या वतीने स्वातंत्र्य दिनाचे औचित्य साधून गाभाऱ्यात आकर्षक सजावट करण्यात आली. खंडोबा मंदीरातील गाभा-यात हंगामाप्रमाणे फुलांची, द्राक्षाची, आंब्याची, दवण्याची, दिवाळीच्या फराळाची, भंडा-याची अशी वेगवेगळी सजावट गाभा-यात केली जाते.

हे देखील पहा -

सध्या खंडोबा मंदीर दर्शनासाठी बंद असले तरी नित्य नियमाच्या पुजा सध्या सुरु आहेत.त्रिकाळ नित्य पुजा पुजारी सेवक वर्गाकडून परंपरेनुसार केल्या जात आहेत. याबरोबरच टोकियोत पार पडलेल्या ऑलिंपिक सुवर्णपदक विजेता निरज चोप्राचं आकर्षक रांगोळीच्या माध्यमातून अभिनंदन देखील करण्यात आलं आहे.

ही रांगोळी मंदिराच्या प्रांगणात काढण्यात आली आहे. त्यामध्ये नीरज चोप्राचा भालाफेक व त्याची हुबेहूब अशी चित्रकृती रांगोळी साकारून त्यास मल्हारी मार्तंड देवस्थानच्या वतीने शुभेच्छा देण्यात आल्या आहेत. भारत मातेच्या शिरपेचात मानाचा तुरा रोवल्याबद्दल नीरज चोप्रा यांचे स्वातंत्र्यदिनाचे औचित्य साधून हार्दिक अभिनंदन केल्याचे श्री मार्तंड देवस्थानचे मुख्य विश्वस्त पंकज निकुडे यांनी सांगितले आहे.

Edited By : Krushnarav Sathe