हिंगोली : हिंगोलीत शेतकऱ्यांनी वनविभागाच्या जमिनीवर झालेले अतिक्रमण काढण्यासाठी गेलेल्या वन विभागाच्या पथकावर प्राणघातक हल्ला केल्याची धक्कादायक घटना घडली आहे. हिंगोलीच्या (Hingoli) पातोंडा गावातील शिवारात हा प्रकार घडला असून या घटनेत वन विभागाचे दोन अधिकारी व नऊ कर्मचारी जखमी झाले आहेत. दरम्यान अतिक्रमण केलेल्या शेतकऱ्यांच्या (Farmer) हल्ल्याला प्रत्युत्तर देताना वन विभागाच्या अधिकाऱ्यांनी तीन वेळा हवेत गोळीबार करत गावकऱ्यांवर लाठीचार्ज केला आहे.

पोलीस (Police) व वनविभागाच्या लाठी चार्ज दरम्यान 50 पेक्षा अधिक गावकरी देखील जखमी झाले आहेत तर एका शेतकऱ्याने अतिक्रमणाच्या कारवाईला विरोध करत घटनास्थळावर विष प्राशन करून आत्महत्या करण्याचा प्रयत्न केला आहे, त्याच्या वर हिंगोलीच्या जिल्हा सामान्य रुग्णालयात उपचार सुरु आहेत. या घटनेप्रकरणी बासंबा पोलीस स्थानकात गुन्हे दाखल करण्याची प्रक्रिया सुरू असून, पातोंडा गावात पोलीस दंगा नियंत्रण पथक व पोलीस अधिकारी तळ ठोकून आहेत.

Edited By: Pravin Dhamale