Asim sarode on Manoj Jarange Patil : विधानसभा निवडणुकीत मनोज जरांगे पाटील यांनी घेतलेल्या माघारीबाबत सामाजिक कार्यकर्ते असिम सरोदे यांनी मोठा गौप्यस्फोट केला. शरद पवार आणि उद्धव ठाकरे यांच्या सांगण्यावरुन मनोज जरांगे पाटील यांच्याशी चर्चा केली. त्यानंतर मनोज जरांगे पाटील यांनी उमेदवार न देण्याचा निर्णय घेतला, असा दावा असिम सरोदे यांनी केला आहे. मनोज जरांगे यांनी माघार घेतला, त्याचा खूप मोठा फायदा आहे, असेही सरोदे म्हणाले.

मराठा आरक्षणासाठी मनोज जरांगे यांनी विधानसभा निवडणुकीत लढण्याचा निर्णय घेतला. उमेदवारही दिले, त्यांनी राजकीय मोट बांधण्यास सुरुवातही केली. पण अचानक उमेदवारी मागे घेण्याच्या दिवशी मनोज जरांगे पाटील यांनी आपल्या कार्यकर्त्यांना उमेदवारी मागे घेण्याचा निर्णय घेतला. मनोज जरांगे यांनी निवडणुकीतून माघार घेतल्यानंतर अनेक चर्चा सुरु झाल्या होत्या. आता मनोज जरांगे पाटील यांनी माघार घेतल्याचं कारण समोर आलेय. असिम सरोदे यांनी मनोज जरांगे पाटील यांच्यासोबत मध्यरात्री चर्चा केली होती. त्यावेळी त्यांच्यामध्ये महत्त्वाची चर्चा झाली. त्यानंतर मनोज जरांगे पाटील यांनी निवडणुकीतून माघार घेण्याचा निर्णय घेतला. असिम सरोदे यांनी मनोज जरांगे पाटील यांच्याशी चर्चा करण्याआधी याबाबत उद्धव ठाकरे आणि शरद पवार यांचं याबाबत मत जाणून घेतलं होतं. या सर्व गोष्टींचा खुलासा असिम सरोदे यांनी बारामती येथील आपल्या भाषणादरम्यान केला.

बारामतीमध्ये असिम सरोदे काय म्हणाले?

मनोज जरांगे पाटील माझ्यासोबत बोलत असतात, ते माझ्या ऑफिसमध्येही आले होते, याबाबत मी शरद पवार यांना सांगितले होते. त्यावेळी शरद पवार म्हणाले की, ते बोलत असतील तर तुम्ही संवाद करायला पाहिजे. उद्धव ठाकरे यांच्यासोबतही बोलणं झालं, तेही चांगलेय म्हणाले.

त्यानंतर मग आम्हाला वाटलं, ७८ सभा घेतल्या. आता विधानसभेच्या निवडणुकीत काय सुरु होणार? मराठा समाजाच्या नावाखाली इतके लोकं उभे राहत असतील, तर मतांचे विभाजन होणार. मत विभाजनाचा फायदा कुणाला होणार? त्यामुळे मी मनोज जरांगे यांच्याकडे गेलो. रात्री साडेअकरापासून तीन वाजेपर्यंत आमची वेगवेगळ्या विषयावर चर्चा झाली.

मराठा क्रांती मोर्चा किंवा मराठा आरक्षणासाठी जे मोर्चे काढले, ते महत्त्वाचे सामाजिक काम आहे. तुम्ही सामाजिक कार्यकर्ता म्हणून रचनात्मक काम करणारा माणूस म्हणून हीच भूमिका कायम ठेवा. मनोज जरांगे पाटील यांनी उमेदवार उभे करावेत, असे कुणा कुणाला वाटत होते, त्यांनी मी त्याची यादी काढण्यास सांगितली. देवेंद्र फडणवीस यांची सर्वात आधी इच्छा होती. लक्ष्मण हाके, महाजन यासारखे नेते होते. समाजात फूट पाडू नका... असा सल्ला त्यांना दिला. त्यानंतर त्यांनी माघार घेण्याचा निर्णय घेतला.