लातूर: लातूर (Latur) जिल्ह्यातील हासोरी या गावात मंगळवारी रात्री भूकंपासारखा आवाज येऊ लागला. त्यामुळे भूकंपाच्या भितीने गावातील नागरिक रात्री १०.१२ मिनिटांनी घराबाहेर येऊन थांबले. अचानक जमीन हादरण्याचा आवाज आल्याने भूकंपाच्या भीतीने अनेकांनी घरं सोडली. गावात सगळीकडे धावपण सुरू होती. एकाबाजूला बाहेर पाऊस तर दुसरीकडे जमीन हादरवणारा आवाज येत होता. त्यामुळे भीतीचे वातावरण पसरले आहे.

मिळालेली माहिती अशी, लातूर (Latur) जिल्ह्यातील निलंगा तालुक्यातील हासोरी गावात व परिसरातील गावात ५ व ७ सप्टेंबर रोजी भूकंपासारखा धक्का जाणवल्याची माहिती गावकऱ्यांनी लोकप्रतिनिधी व प्रशासनाला दिली. यावेळी लातूर येथील भूगर्भ शास्त्रज्ञांनी भेट देऊन लोकांशी चर्चा केली. आणि हा भूकंप नाही व तशी कोणतीही नोंद झालेली नसल्याची माहिती दिली. त्यामुळे लोकांनी घाबरु नये असेही सांगितले.(Latur Latest News)

पण पुन्हा काही दिवसांनी असाच आवाज येऊ लागला. रात्री १० वाजून १५ मिनिटांनी भूकंप झाल्याचे लोकांना जाणवले त्यामुळे एकच गोंधळ उडाला आहे. लोक स्वतःचा जीव वाचवण्यासाठी रस्त्यावर येऊन आरडाओरड सुरू झाली. संपूर्ण गाव रस्त्यावर आले. लोक भीतीपोटी घरी झोपायला तयार नाहीत, तर दुसरीकडे मुसळधार पाऊस सुरू आहे, त्यामुळे बाहेरही झोपू शकत नाही, अशा अवस्थेत गाव आहे. या घटनेचे गांभीर्य प्रशासन घेवून वस्तुस्थितीची जाणीव करून देणे आवश्यक आहे. (Latur Latest News)