सागर निकवडे, साम टीव्ही, प्रतिनिधी

Nandurbar : दसऱ्याच्या पूर्वीच भारतीय रेल्वेने प्रवाशांना नवीन गिफ्ट दिले आहे. देशातील अद्यावत असलेली अमृत भारत ट्रेनचा आजपासून शुभारंभ होत आहे. आज (२७ सप्टेंबर) पंतप्रधान नरेंद्र मोदी आणि रेल्वे मंत्री अश्विनी वैष्णव यांनी व्हिडीओ कॉन्फरन्सच्या माध्यमातून अमृत भारत रेल्वेचा हिरवा झेंडा दाखवत रेल्वेचा शुभांरभ केला.

मिळालेल्या माहितीनुसार, नंदुरबार रेल्वे स्थानकावरून अमृत भारत अंतर्गत उधाना ब्रह्मपुर या विशेष रेल्वेला हिरवा झेडा दाखवण्यात आला आहे. ही विशेष रेल्वे गाडी महाराष्ट्रातील १४ स्थानकांवर थांबा घेणार आहे. याचा थेट फायदा प्रवाशांना होणार आहे. नरेंद्र मोदी आणि अश्विनी वैष्णव यांच्या डिजिटल उपस्थितीत रेल्वे नंदुरबार स्थानकावरुन निघाली.

गुजरातच्या उधनापासून ते ओडिशाचा ब्रह्मपुर या दिशेनेही अमृत भारत रेल्वे ही स्पेशल ट्रेन दर रविवारी धावणार आहे. ही अमृत भारत ट्रेन सुमारे ३३ तासात १७ हजार किलोमीटर धावणार आहे. महाराष्ट्रातील एकूण १४ रेल्वे स्थानकावर ही रेल्वे थांबणार आहे. महाराष्ट्रातील नंदुरबारच्या रेल्वे स्थानकावर ही नवीन रेल्वे पोहचताच लोको पायलट यांचा सन्मान करत माजी खासदार यांना गावित, माजी जिल्हा परिषद सदस्य सुप्रिया गावित यांचा हस्ते हिरवा झेंडा दाखल नंदुरबार मधून रेल्वेला रवाना करण्यात आले.

ही अमृत भारत ट्रेन आठवड्यातून एकदा म्हणजेच रविवारी ओडिशाकडे मार्गस्थ होणार आहे. ओडिशापर्यत पोहचण्यासाठी पंतप्रधान नरेंद्र मोंदीनी ही ट्रेन उपलब्ध करुन दिल्याबद्दल या परिसराच्या नागरिकांकडून डॉ. हिना गावितांनी नरेंद्र मोदींचे धन्यवाद व्यक्त केले आहे. या ट्रेनचा फायदा अनेक प्रवाशांना होणार आहे.