अमरावतीतून एक धक्कादायक बातमी समोर येत आहे. वाळू माफियांकडून चक्क तहसीलदारांच्या अंगावर ट्रक नेण्याचा प्रयत्न झाला आहे. ही संपूर्ण घटना सीसीटीव्ही कॅमेऱ्यामध्ये कैद झाली आहे. अधिकारी असल्याचं लक्षात येताच नदीपात्रातून उत्खनन करीत असलेले मजूर देखील रफुचक्कर झाले. दरम्यान, पोलिसांना याची माहिती मिळताच त्यांनी गुन्हा नोंदवत मिनी ट्रॅक जप्त केला आहे.

ही धक्कादायक घटना अमरावती जिल्ह्यातील भातकुली तालुक्यातील हातुर्णा येथील पेढी नदीपात्राजवळ घडली आहे. वाळू माफियांनी थेट तहसीलदारांच्या अंगावर ट्रॅक घालण्याचा प्रयत्न केला. संबंधित प्रकार सीसीटीव्ही कॅमेऱ्यात कैद झाला आहे. पोलिसांनी दिलेल्या माहितीनुसार, अधिकाऱ्याची ओळख पटताच उत्खनन करत असलेले मजूर घटनास्थळावरून फरार झाले.

दरम्यान, या घटनेबाबत मंडळ अधिकाऱ्यांनी बडनेरा पोलीस स्टेशनमध्ये तक्रार दाखल केली असून, पोलिसांनी एका आरोपीविरोधात गुन्हा दाखल केला आहे. तसेच नदीपात्रातून एका मिनी ट्रॅकही जप्त केला आहे. या प्रकारामुळे अमरावती जिल्ह्यातील विविध भागांमध्ये सुरू असलेल्या बेकायदेशीर वाळू उत्खननाचे वास्तव समोर आले आहे.

वाळूच्या या अवैध तस्करीमुळे शासनाचा लाखों रुपयांचा महसूल बुडत आहे. या पार्श्वभूमीवर, वाळू माफियांवर नियंत्रण आणण्यासाठी प्रशासन कोणत्या ठोस उपाययोजना करणार याकडे आता सर्वांचे लक्ष लागले आहे.