अमरावती : अमरावती जिल्ह्यातील चिखलदराच्या सिमोरी गावात एक धक्कादायक घटना घडली आहे. एका २२ दिवसाच्या बाळाला गरम विळा तापवून ६५ वेळा चटके देण्यात आलं आहे. गावातील भोंदूबाबाने हे चटके दिल्याची चर्चा असून, या संतापजनक घटनेमुळे अंधश्रद्धेचा कळस पाहायला मिळत आहे. या प्रकारामुळे बाळाची प्रकृती गंभीर असून, रूग्णालयात उपचार सुरू आहे.

मात्र, या घटनेला आता धक्कादायक वळण लागलं आहे. या प्रकरणात जन्मदात्या आईनेच बाळाला चटके दिल्याचं धक्कादायक वास्तव पोलीस तपासातून उघडकीस आलं आहे. अमरावतीच्या चिखलदरा पोलीस स्टेशनमध्ये आईविरुद्ध गुन्हा दाखल करण्यात आला आहे. २२ दिवसाच्या बाळाला तब्बल ६५ वेळा विड्याने चटके दिल्याची धक्कादायक घटना चिखलदरा तालुक्यातील सिमोरी गावात उघडकीस आली होती. त्यानंतर पोटच्या लेकाला आईनेच चटके दिल्याचा प्रताप समोर आला आहे.

आईविरोधात अंधश्रद्धा निर्मूलन, बाल अत्याचार प्रतिबंध कायद्याने गुन्हा दाखल करण्यात आला आहे. तर चटके दिलेल्या बाळाची प्रकृती गंभीर असल्याने पुढील उपचारासाठी त्याला नागपूरला पाठवण्यात आलं आहे. बाळाला श्वास घेण्यासाठी त्रास होत असल्याने चटके देण्यात आले असल्याचं समोर आलं आहे.