अंबरनाथ : सूरत, गुवाहाटी, गोवा असं भ्रमण करत शिवसेनेचे (Shivsena) बंडखोर आमदार आपापल्या मतदारसंघात परतले आहेत. शिवसेनेच्या बंडखोरीमुळे महाविकास आघाडी सरकार कोसळलं आहे. त्याजागी राज्यात एकनाथ शिंदे गट आणि भाजपचं सरकार आलं आहे. शिंदे गटातील सर्वच बंडखोर आमदार हे स्वत:च्या मतदारसंघात परतल्यानंतर त्यांनी दैंनदिन कामाला सुरुवात केली आहे. त्यानंतर आज, बुधवारी अंबरनाथमध्ये (Ambernath) शिवसेनेचे बंडखोर आमदार डॉ. बालाजी किणीकर यांना महिला शिवसैनिकांच्या रोषाला सामारे जावं लागलं आहे. महिला शिवसैनिक आणि शिंदे गटाचे आमदार डॉ. बालाजी किणीकर समोरासमोर आल्यानं त्यांच्यात शाब्दिक बाचाबाची झाल्याची पहायला मिळाली. ( Ambernath News In Marathi )

अंबरनाथ पालिकेत आमदारांनी विकासकामांबाबत पत्रकार परिषद आयोजित केली. त्यावेळी शिवसेनेच्या महिला कार्यकर्त्याही शहरातील समस्या घेऊन पालिकेत आल्या. मात्र, यावेळी अंबरनाथ पालिकेच्या मुख्याधिकाऱ्यांनी आधी आमदारांना वेळ दिल्याने महिला कार्यकर्त्या या बंडखोर आमदार डॉ. बालाजी किणीकर यांच्यावर संतापल्या. बंडखोर आमदार डॉ. बालाजी किणीकरांचा गट आणि महिला शिवसैनिकांचा गट आमनेसामने आल्याने अंबरनाथ पालिकेत काही वेळेसाठी तणावाचं वातावरण निर्माण झालं होतं.

यावेळी एका महिला शिवसैनिकानं माध्यमांशी बोलताना सांगितले की, 'डॉ. बालाजी किणीकर हे स्वत:ला शिवसेनेचे असल्याचे सांगत आहेत. दगडाला शेंदूर फासतात, त्याप्रमाणे त्यांना निवडणुकीत उभं केलं होतं. आम्हा महिलांच्या प्रत्येक विभागातल्या समस्या आहेत. आम्हा महिलांना नेहमी डावललं जातं. याआधीपासून आमचा आरोप आहे. आज किणीकर यांनी बैठक आयोजित करून वेगळा गट केला. आम्हाला बोलावण्यात देखील आलं नाही.

आम्ही महिला शिवसैनिकांनी आमदार किणीकरांचा निवडणुकीत प्रचार केला, ते केवळ त्यांच्या गटामुळे निवडणून आले नाहीत'. दरम्यान, बंडखोर आमदार डॉ. बालाजी किणीकर (Dr Balaji Kinikar) यांनी या महिला शिवसैनिकांच्या आरोपानंतर प्रतिक्रिया दिली आहे. आम्हाला कुणी निवडून आणलं हे सगळ्यांना माहित आहे. त्यामुळे जे लोक म्हणत आहे की, दगडला शेंदूर फासून आमदार केलं ते बालिश असल्याचे आमदार डॉ. बालाजी किणीकर यांनी सांगितले.