अकोला, गत काही वर्षांपासून अकोला ते अकोट या महमार्गाचे काम रखडलेले आहे. खराब रस्त्यामुळे या महामार्गावर अनेकांचे जीव गेले असून आजही एका युवकाचा अपघातात बळी गेला आहे. भरधाव वेगाने येणाऱ्या ट्रकने एका दुचाकीस्वाराला उडवल्याची घटना अकोला-अकोट मार्गावरील बळेगाव फाट्याजवळ घडली. हा अपघात इतका भयानक होता की, अपघातात युवकाचा जागीच मृत्यू झाला आहे.

अपघातात मृत्यू झालेल्या युवकाची ओळख पटली नसून या प्रकरणाची माहिती अकोट ग्रामीण पोलिसांना मिळताच पोलिसांनी घटना स्थळ गाठले आणि पुढील तपास सुरू केला आहे.

अपघातानंतर ट्रक चालकाने घटनास्थळावरून पलायन केले. या प्रकरणी अज्ञात ट्रक चालकाविरुद्ध गुन्हा दाखल करण्यात आला आहे. गत काही वर्षांपासून अकोला अकोट या महामार्गाचे काम सुरू आहे. अतिशय संथ गतीने या महामार्गाचे काम सुरू असून मार्गावर जागोजागी खड्डे पडले आहेत. पावसाळ्यात तर चिखलामुळे वाहनांना वाहन चालवताना मोठी कसरत करावी लागते. तर या महामार्गावर आतापर्यंत अनेकांचे नाहक बळी गेले आहेत. मात्र तरीही कुणाला याचे देणेघेणे नाही. त्यामूळे या महामार्गाचे काम कधी पूर्ण होईल असा संतप्त सवाल नागरिक विचारत आहेत.