अक्षय गवळी, साम टीव्ही

Akola Accident : रेल्वे प्रवाशांच्या सुरक्षिततेला हादरवणारी धक्कादायक घटना आज अकोला जिल्ह्यात घडली. जिल्ह्यातील मूर्तिजापूर रेल्वे जंक्शनवर ही घटना घडलीय. रेल्वेतून उतरताना प्रवासी हा फलाट आणि ट्रेनच्या फटीत अडकला. या भीषण अपघातून प्रवासी बचावला.

पुणे–अमरावती या गाडीतून मूर्तिजापूरला अंत्यसंस्कारासाठी आलेल्या अकोल्यातील मुस्ताक खान मोईन खान यांचा विचित्र अपघात झाला. हा प्रवासी दुपारी पावणे चारच्या सुमारास प्लॅटफॉर्म क्रमांक दोनवर उतरतानाच घसरला आणि थेट गाडीच्या खाली अडकला. जखमी प्रवासी एवढा घट्ट अडकला होता की त्याला बाहेर काढणे अशक्यप्राय ठरत होते.

तत्काळ रेल्वे पोलिसांनी जय गजानन आपत्कालीन पथकाला पाचारण केले. पथकाने गॅस कटरच्या सहाय्याने गाडीचे पायदान कापून अडकलेल्या मुस्ताक खानची सुटका केली. या दरम्यान प्रवाशांचा श्वास रोखला गेला होता. अपघातात त्याच्या दोन्ही पायांना गंभीर दुखापत झाली असून त्याला तात्काळ श्रीमती लक्ष्मीबाई देशमुख उपजिल्हा रुग्णालयात दाखल करण्यात आले. उपचार सुरू आहेत.

दरम्यान, या घटनेमुळे पुणे–अमरावती गाडी तब्बल एक तास वीस मिनिटे प्लॅटफॉर्मवर उभी राहिली होती. गाडी थांबून राहिल्याने इतर प्रवाशांमध्ये प्रचंड गोंधळ निर्माण झाला होता. या अपघाताने रेल्वे सुरक्षेच्या उपाययोजनांवर प्रश्नचिन्ह उभे केले असून स्थानिक प्रवाशांतून मोठी चिंता व्यक्त होत आहे.