अक्षय गवळी, साम टीव्ही

बदलापुरातील अक्षय शिंदे प्रकरणाची पुनरावृ्ती अकोल्यात झाली आहे. शाळेतीलच एका कर्मचाऱ्याने तब्बल १० चिमुकल्या विद्यार्थीनींचा विनयभंग केला आहे. या प्रकरणाची माहिती मिळाल्यानंतर चाइल्ड हेल्पलाइनच्या महिला समन्वयक हर्षाली गजभिये यांनी पोलीस ठाण्यात तक्रार दाखल केली. पोलिसांनी आरोपीला बेड्या ठोकल्या आहेत. ही धक्कादायक घटना अकोला शहरातल्या कौलखेड भागातील एका शाळेत घडली आहे. या घटनेनंतर परिसरात खळबळ उडाली आहे.

नेमकं प्रकरण काय?

शाळेतील काही महिला शिक्षिका प्रशिक्षणासाठी बाहेरगावी गेल्या होत्या. ५ मार्चपासून शिक्षिका शाळेत उपस्थित नव्हत्या. यावेळी शाळेचे कामकाज सांभाळण्याची जबाबदारी शाळेतील एका कर्मचाऱ्यावर पडली. हेमंत चांदेकर या आरोपी कर्मचाऱ्याचे नाव आहे. याच परिस्थितीचा फायदे घेत आरोपीने शाळेतील दहा विद्यार्थिनींचा विनयभंग केला आहे.

हे दहा विद्यार्थिनी इयत्ता चौथी आणि इयत्ता सातवीत शिकत असल्याची माहिती समोर आली आहे. आरोपीने परिस्थितीचा फायदा घेत शारीरिक लगट करत विद्यार्थीनींचा विनयभंग केला आहे. शाळेतील शिक्षिका प्रशिक्षण आटोपून आल्यानंतर विद्यार्थीनींनी सगळा प्रकार शिक्षकांच्या कानावर घातले. तसेच आरोपी कर्मचाऱ्याने काय काय कृत्य केले, सगळी माहिती दिली.

यानंतर शिक्षकांना संताप अनावर झाला. त्यांनी कर्मचाऱ्याने केलेल्या कृत्याची माहिती शाळेच्या संचालकांना दिली. संचालकांनी या प्रकाराची तक्रार लगेच चाईल्ड हेल्पलाइनला केली.

याप्रकरणी जिल्हा व महिला बालविकास अधिकारी कार्यालयांतर्गत येणाऱ्या चाइल्ड हेल्पलाइनच्या महिला समन्वयक हर्षाली गजभिये यांनी पोलीस ठाण्यात धाव घेत तक्रार दाखल केली. तक्रारीनुसार, पोलिसांनी आरोपीला अटक केली. सध्या आरोपी चांदेकरची रवानगी न्यायालयीन कोठडीत करण्यात आलेली आहे.