अक्षय गवळी 

अकोला : अंगणवाडीतील बालकांच्या जीवाशी खेळ सुरु असल्याचा प्रकार अकोल्यात समोर आला आहे. अंगणवाडीतील लहान बालकांसह गरोदर मातांना दिला जाणारा पोषण आहार हा कीड लागलेला आहे. तर काही पोषण आहाराचे पाकीट मुदत संपलेली असल्याचे देखील आढळून आली आहे.  

अकोला (Akola) जिल्ह्यातील बोरगाव मंजू येथे हा प्रकार उजेडात आलाय. दरम्यान कालच बोरगाव मंजू येथील १७ अंगणवाडीमध्ये लहान बालकांचा पोषण आहार वितरित करण्यात आला. मात्र, हा पोषण आहार (Poshan Aahar) कीड लागलेला असल्याचं समोर आलं. या संदर्भात नागरिकांनी तक्रारी केल्या. त्यानंतर हा मुद्दा आज अकोला पंचायत समितीच्या सभागृहात चांगलाच गाजला. पंचायत समिती सदस्य तथा ठाकरे गटाचे गटनेते भरत बोरे यांनी हा मुद्दा सभागृहात मांडत सभागृहात कीड लागलेली मुगाची डाळ टेबलावर टाकली. 

यामध्ये कीड लागलेली खिचडी मसाला तांदूळ आणि बालकांना 3 वर्षापर्यत दिल्या जाणारं प्रोटीन हे एक्सपायरी असल्याचं समोर आलं. दरम्यान अंगणवाडीतील पोषण आहार वाटप प्रक्रिया थांबण्यात यावी आणि या प्रकरणाची संपूर्ण चौकशी व्हावी; अशी मागणी बोरे यांनी केली आहे. विशेष म्हणजे अनेक ठिकाणी या पोषण आहाराचा घरोघरी वाटप करण्यात आलेला आहे.