अकोला जिल्ह्यातील बाळापूरनजीक लक्झरी बस पुलावरून खाली कोसळली. भिकूंड नदीच्या पुलावरून बस खाली कोसळून हा अपघात झाला. संध्याकाळी सव्वासातच्या सुमारास ही घटना घडली. बसमधील सर्व प्रवासी हे वाशिम येथील रहिवासी असल्याची माहिती समोर आली आहे. बसमधील प्रवासी हे अयोध्येवरून परत येत होते. बाळापुरजवळील भीकुंड नदीच्या पुलावर या खाजगी बसचा ब्रेक न लागल्याने ही बस पुलावरून नदीत कोसळली.

नदीला जास्त पाणी नसल्यामुळे मोठी दुर्घटना टळली. या घटनेत कुठलीच जीवितहानी झाली नसून ५० प्रवासी सुखरूप आहेत. यात काहींना किरकोळ दुखापत झाली आहे. घटनेची माहिती मिळताच बाळापूर पोलीस घटनास्थळी धाव घेत जखमींना रुग्णालयात दाखल केले. या अपघातानंतर बस चालवणारा क्लीनर फरार झाला आहे. या घटनेचा तपास बाळापूर पोलिसांकडून सुरू आहे. पोलिसांकडून बसच्या क्लीनरविरोधात गुन्हा दाखल केला असून त्याचा शोध घेत आहेत.

या अपघातासंदर्भात धक्कादायक माहिती समोर आली आहे. अपघात झालेली लक्झरी बस ही बसमधील क्लीनर चालवत होता. बसच्या क्लीनरला वाहन चालवण्याचा कुठलाही अनुभव नसताना हा बस कसा चालवतो? असा प्रश्नही आमदार नितीन देशमुखांनी साम'शी बोलतांना उपस्थित केला आहे. सुदैवाने या अपघातामध्ये कोणतीही जीवितहानी झाली नाही. अयोध्येवरून परत येत असताना हा अपघात झाला. त्यामुळे एकच खळबळ उडाली.