अक्षय गवळी, अकोला

Akola Accident News :

अकोल्यातून अपघाताची मोठी घटना समोर आली आहे. अकोला जिल्ह्यातील बाळापूर पातूर रस्त्यावर अपघात झाला आहे. या तिहेरी अपघातात तिघांचा मृत्यू झाला आहे. सोमवारी साडेसात वाजण्याच्या सुमारास ही अपघाताची घटना घडली. बाळापूर पोलीस स्टेशनच्या हद्दीत ही घटना घडली. या अपघाताने घटनास्थळी एकच खळबळ उडाली. (Latest Marathi News)

मिळालेल्या माहितीनुसार, अकोल्यात तिहेरी अपघात झालाय. अकोला जिल्ह्यातील बाळापूर पातूर रस्त्यावरील वाडेगावजवळ झालेल्या अपघातात तिघांचा मृत्यू झाला आहे. तर तीन जण गंभीर जखमी झाले आहेत. या अपघातातील जखमींना उपचारासाठी रुग्णालयात दाखल करण्यात आलं आहे.

अपघात कसा झाला?

बाळापुरात राहणारे सर्वजण दुचाकीवरून दररोजचं काम संपवून बाळापूरकडे जात होते. अकोल्यात बाळापूर पातूर रस्त्यावर आल्यानंतर दोन दुचाकींची समोरासमोर धडक झाली. या अपघातानंतर दोन्ही दुचाकीस्वारासहित सर्व जण खाली कोसळले. त्यानंतर पाठीमागून येणाऱ्या कंटेनरने तिघांना चिरडले.

या अपघातात तीन जणांचा जागीच मृत्यू झाला आहे. तर तिघांना तातडीने शासकीय रुग्णालयात उपचारासाठी दाखल करण्यात आलं आहे. ही अपघाताची घटना आज सोमवारी रात्री साडेसात वाजताच्या सुमारास घडली आहे.

अपघाताची माहिती मिळताच बाळापूर पोलीस घटनास्थळी दाखल झाले. या अपघातानंतर पोलीस सध्या वाहतुकीचा मार्ग सुरळीत करण्याचा प्रयत्न करत आहे. शेख सादीक शेख रज्जाक (वय 45), शेख खालीद शेख रज्जाक (वय 40), शेख माजीद शेख सादीक (वय 24) असे तीनही अपघातातील मृतकांचे नावे आहेत. अपघातामधील हे तिन्ही जण बाळापूर येथील राहणारे होते.

अपघातानंतर घटनास्थळी प्रचंड गोंधळ उडाला. स्थानिकांची मोठी गर्दी झाली. या घटनेनंतर कंटेनर चालकाला पोलिसांनी ताब्यात घेतलं आहे. या अपघात प्रकरणी पोलीस पुढील तपास करीत आहे.