अक्षय गवळी 

अकोला : 'हिट अँड रन' चा थरार पुन्हा एकदा घडला आहे. अकोल्यात हा थरार दुपारच्या सुमारास घडला असून या घटनेत एका कार चालकाने पाच ते सहा दुचाकींना उडवलं आहे. तर एका दुचाकीला दीड किलोमीटर अंतरापर्यंत फरफटत नेले आहे. यामध्ये दोन जण जखमी झाले असून संतप्त जमावाने कारची तोडफोड केली आहे. सदर कार पोलीस कर्मचाऱ्यांची असल्याची प्राथमिक माहिती समोर आली आहे. 

अकोल्यातल्या मोठी उमरी भागातील जिल्हा परिषद शाळेसमोर हा संपूर्ण हिट अँड रनचा थरार घडला आहे. यामध्ये भरधाव वेगाने कार चालवत रस्त्यावरील पाच ते सहा दुचाकीला उडविले आहे. तर कार चालकाने तब्बल दीड किमीपर्यंत दुचाकीला फरफटत नेले. इतकेच नव्हे, तर पुढे चार ते पाच दुचाकी वाहनांना उडवल आहे. या अपघात दोन पेक्षा जास्त जण जखमी झाले आहेत. ही थरारक घटना सीसीटीव्ही कॅमेरात कैद झाली आहे. 

जमावाकडून चालकाला चोप देत कारची तोडफोड 
सदरच्या घटनेत दीड किमी अंतरावर नागरिकांनी कारचा पाठलाग केला. त्यानंतर अखेर कार चालक नागरिकांच्या तावडीत सापडला आणि नागरिकांनी थेट गाडीची तोडफोड केली.. या तोडफीडीत वाहनाच्या काचा फोडण्यात आले, त्यासोबतच कार चालकाला बेदम चोप दिला. दरम्यान, सदरची कार एका पोलीस कर्मचाऱ्यांची असल्याचे सांगितले जात असून सोळुंके नामक व्यक्तीची कार आहे. पोलिसांनी या कारसह चालकाला ताब्यात घेतले आहे. 

जखमीची प्रकृती चिंताजनक  

एसटी महामंडळमध्ये कार्यरत गोपाल नागे असं अपघातात जखमी झालेल्या व्यक्तीचे नाव आहे. त्यांच्या डोक्याला गंभीर दुखापत झाल्याने ते जखमी झाले आहेत. त्यांच्यावर अकोल्यातील खाजगी रुग्णालयात उपचार सुरू असून त्याची प्रकृती चिंताजनक असल्याचे सांगितले जात आहे.