Summary:

• अजित पवार यांचा विमान अपघातात मृत्यू

• बारामतीत विमान कोसळले

• विमान अपघातात अजित पवारांसह ६ जणांचा मृत्यू

• हा अपघात सीसीटीव्हीत कैद झाला याचा व्हिडीओ समोर आला आहे

राज्याचे उपमुख्यमंत्री अजित पवार यांच्या विमानाला बारामतीत भीषण अपघात झाला. बारामतीमध्ये प्रचारासाठी निघालेले अजित पवार यांचे विमान कोसळलं. या विमान अपघातामध्ये अजित पवार यांच्यासह ६ जणांचा मृत्यू झाला. हा विमान अपघात सीसीटीव्ही कॅमेऱ्यामध्ये कैद झाला आहे. या विमान अपघाताचा व्हिडीओ समोर आला असून तो व्हायरल होत आहे. या व्हिडीओमध्ये अपघाताचा थरार पाहायला मिळत आहे.

अजित पवारांचे विमान कोसळल्याचा व्हिडीओ समोर आला आहे. या अपघाताचा थरार रस्त्याच्या कडेला असलेल्या पेट्रोल पंपावर लावण्यात आलेल्या सीसीटीव्ही कॅमेऱ्यात कैद झाला आहे. या व्हिडीओमध्ये स्पष्ट दिसत आहे की, विमान कोसळल्यानंतर मोठा स्फोट होतो. त्यानंतर आगीच्या ज्वाळा आणि धुराचे लोट आकाशात पसरल्याचे दिसत आहे. या व्हिडीओवरून अपघाताची भीषणता समजून येत आहे.

जिल्हा परिषद निवडणुकीनिमित्त अजित पवार यांच्या बारामतीमध्ये आज चार सभा होणार होत्या. या सभेसाठी अजित पवार आज सकाळी साडेसात वाजता मुंबईवरून बारामतीच्या दिशेने रवाना झाले. ते विमानाने बारामतीला जात होते. सकाळी ९ वाजता ते बारामतीत पोहचणार होते. पण बारामती विमानतळावर विमान लँडिंग करत असताना कोसळले. बारामती विमानतळाजवळ शेतामध्ये त्यांचे विमान कोसळले. हे विमान कोसळल्यानंतर त्याचे तुकडे झाले आणि आग लागली. या घटनेत विमान जळून खाक झाले.