अजित पवारांचे एक-एक शिलेदार साथ सोडून शरद पवारांकडे जात आहेत. या पार्श्वभूमिवर अजित पवारांचे भाष्य चर्चेत आलंय. शरद पवारांना विचारुनच राजकीय भूमिका घेतल्याचा पुनरुच्चार दादांनी केलाय. पाहूया एक रिपोर्ट.

राज्यात विधानसभा निवडणुका तोंडावर आल्यात. राजकीय पक्षांनी जोरदार तयारी सुरू केली आहे. महायुती असो वा मविआ सर्वच पक्षांमध्ये जागावाटपाच्या मुद्यावर बैठकांचे सत्र सुरू आहे. तर दुसरीकडे राजकीय पक्षांमध्ये इन कमिंग-आऊट गोईंग सुरु आहे. सर्वाधिक फटका अजित पवारांच्या पक्षाला बसतोय. दादांचे एक-एक शिलेदार पवारांच्या दाराशी जात असतानाच बारामतीमध्ये एका कार्यक्रमा दरम्यान दादांनी भाजप बरोबरच्या युतीबाबत वक्तव्य केलंय. ‘शरद पवार यांना सांगूनच मी माझी राजकीय भूमिका घेतली होती’, असं वक्तव्य अजित पवारांनी केलंय.

अजित पवारांच्या या वक्तव्यावर सुप्रिया सुळेंनी भाष्य करणं टाळलंय. लोकसभा निवडणुकीत बारामतीमध्ये सुप्रिया सुळे यांच्याविरोधात घरातील उमेदवार देणं ही माझी चूक होती,असा पुनरुच्चारही अजित पवार यांनी केला. गडचिरोलीच्या अहेरीत धर्मरावबाबा आत्राम यांची कन्या भाग्यश्री आत्राम यांनी विधानसभेत वडिलांच्या विरोधात रणशिंग फुंकले आहे.

यावेळी अजितदादांनी कुटुंब एकसंघ ठेवण्यावर भाष्य करत चूक भूल करू नका, बापासोबत रहा.. अशा शब्दात साद घातली होती. मात्र आता पुन्हा एकदा अजितदादांनी पवारांना विचारूनच फुटल्याचा दावा केल्यामुळे पुन्हा संभ्रमाचं वातावरण निर्माण होण्याची शक्यता आहे. दादांनी विधानसभा निवडणुकीपूर्वी या विधानाबाबत साधलेल्या टायमिंगचा त्यांच्या पक्षाला किती फायदा होणार हे निकालानंतरच स्पष्ट होईल.