बालाजी सुरवसे, धाराशीव

Dharashiv News: गेल्या काही दिवसांपासून राज्याचे राजकारण वेगवेगळ्या कारणांमुळे चांगलेच ढवळून निघाले आहे. याचे केंद्रबिंदू ठरलेत राष्ट्रवादी काँग्रेसचे नेते अजित पवार (Ajit Pawar). अजित पवार यांनी बंडखोरी करत काही आमदारांसोबत शिंदे-फडणवीस सरकारला पाठिंबा दिला. यामुळे राज्यात मोठा राजकीय भूकंप झाला.

शिंदे-फडणवीस सरकारसोबत हातमिळवणी केल्यानंतर अजित पवार यांनी उपमुख्यमंत्री पदाची शपथ घेतली. अजित पवार उमुख्यमंत्री झाल्यानंतर त्यांच्या कार्यकर्त्यांना आणि निकटवर्तीय आमदारांचा प्रचंड आनंद झाला. अजित पवार यांच्या सासुरवाडीतील लोकांना देखील खूप आनंद झाला आहे. धाराशिवमध्ये अजित पवार यांच्या अभिनंदनाचे बॅनर झळकले आहेत.

राष्ट्रवादीतून बंडखोरी केल्यानंतर उपमुख्यमंत्री झालेल्या अजित पवार यांचे धाराशिव शहरात अभिनंदनाचे बॅनर झळकले आहेत. धाराशिव जिल्ह्यातील तेरगाव हे अजित पवारांची सासरवाडी असून माजी मंत्री डॉ.पद्मसिंह पाटील हे त्यांचे मेहुणे आहेत. धाराशिव जिल्ह्यावर अजित पवारांचे पहिल्यापासूनच वर्चस्व राहिले आहे. अजित पवार यांनी बंडखोरी केल्यानंतर धाराशिव जिल्ह्यातील राष्ट्रवादीचे नेते अजित पवार मागे उभा राहतील,असा अंदाज बांधण्यात आला होता.

मात्र आतापर्यंत जिल्ह्यात कोणत्याही राष्ट्रवादीच्या नेत्याने उघडपणे अजित पवारांसोबत की शरद पवारांसोबत याबाबत भूमिका जाहीर केलेली नाही. त्यातच आता धाराशिव शहरात अजित पवार यांचे अभिनंदन करणारे पोस्टर झळकले आहेत. अजित पवार यांच्यासह शरद पवार यांचाही फोटो या बॅनरवर लावण्यात आला आहे. हे बॅनर कोणत्या नेत्यांनी लावले आहे हे मात्र स्पष्ट झालेले नाही. त्यामुळे जिल्ह्यात चर्चा होत आहेत.